चार वर्ष पहिले कैलालीका युवा भूपेन्द्र बडुवाल हत्या घटनामा जिल्ला अदालत दाङले फैसला सुनाएको छ।
जिल्ला न्यायाधीश गोकुल निरौलाको इजलासले मंगलबार प्रतिवादीमध्ये ६ जनालाई जीवन रहेसम्म र थप सात जनालाई जन्मकैदको फैसला सुनाएको हो।
अदालतका शाखा अधिकृत सूचना अधिकारी पंकज उपाध्यायका अनुसार घटनाका मुख्य प्रतिवादीमध्ये नवीन रावल, रोशनबहादुर शाही, चिरञ्जीवी जंग शाही, आर्यान देवकोटा, रोहित आले र हिमाल शाही समेत गरी ६ जनालाई जीवन रहेसम्म काराबासको फैसला सुनाएको हो।
त्यस्तै, बडुवाल घटनामा प्रतिवादी बनाइएकामध्ये दिपेन्द्र शाही, मदन शाही, हेमन्त शाही, निशान्त मल्ल र शोहन शाह, लोकेन्द्र कुँवर र सविनजंग शाही गरी सात जनालाई जन्मकैद अर्थात २५ वर्ष काराबासको सजाएको फैसला सुनाएको छ।
अदालतका सूचना अधिकारी उपाध्यायका अनुसार जीवन रहँदासम्म काराबास सजाय तोकिएका ६ जना र जन्म कैदको फैसला सुनाइएका सबै गरी १३ जनाबाट दामासाहीका आधारमा कुल १५ लाख पीडितका परिवारलाई क्षतिपूर्ति भराउन आदेश पनि भएको छ।
बडुवाल हत्या घटनाका मुख्य आरोपितमध्येका प्रतिवादी लोकजंग शाही भने फरार छन्। उनको हकमा भने मुद्दा मुलतबिमा रहने आदेश भएको छ।
चार वर्ष पहिलेको लम्कीचुहा नगरपालिका–१ का बडुवाल हत्या घटनामाथि पुस २३ गतेबाट अदालतमा लगातार सुनुवाइ हुँदै २८ गते सकिएको थियो।
अदालतका सूचना अधिकारी उपाध्यायका अनुसार पुस २९ गते भएको फैसलामा घटनामा प्रतिवादी बनाइएकामध्ये सात जनाले भने सफाइ पाएका छन्।
अदालतबाट निर्दोष सावित हुने वा पूर्ण रूपमा सफाइ पाउनेमा अशोक रावल, महेश रावल, जयन्द्र शाह, विकास खड्का, प्रविन रिमाल, विकास सेरचन थकाली र कपिल श्रेष्ठ छन्।
लम्कीचुहा नगरपालिका–१ का २३ वर्षीय बडुवालको २०७८ साल कात्तिक २३ गते टीकापुर नगरपालिका–१ मा लखेटी लखेटी वीभत्स ढंगले हत्या भएको थियो।
कैलाली प्रहरीले यो घटनामा आफ्नो अनुसन्धान सकेर प्रतिवेदन फागुन २६ गते २०७८ गते जिल्ला सरकारी वकिलको कार्यालयलाई बुझाएको थियो। जसमा २१ विरूद्ध कर्तव्य ज्यान शीर्षकमा मुद्दा दायर भएको थियो।
बडुवालको टीकापुर नगरपालिका–१ मा फुटबलको म्याच हेरी फर्किने क्रममा २०७८ कात्तिक २३ गते एक समूहले लखेटी लखेटी धारिलो हतियार प्रहार गरी हत्या गरेको थियो।
बडुवाल हत्या प्रकरणका बारेमा २०७८ फागुन २६ गते जिल्ला सरकारी वकिलको कार्यालयले जिल्ला अदालतमा नवीन रावलसहितका २१ जना विरूद्ध कर्तव्य ज्यान सम्बन्धी मुद्दामा प्रतिवादी बनाउँदै दायर गरेको थियो।
कैलालीको लम्कीचुहा नगरपालिका– ३, चिसापानीका २७ वर्षीय नवीन रावल, २३ वर्षीय महेश रावल, २० वर्षीय धीरज भनिने दीपेन्द्र शाही, २० वर्षीय आर्यन देवकोटा, १९ वर्षीय मदन शाही, लम्कीचुहा– १ का २२ वर्षीय कपिल श्रेष्ठ, १८ वर्षीय निशान्त मल्ल, लम्कीचुहा – ५ का २८ वर्षीय विकास खड्का, टीकापुर नगरपालिका– १ का २३ वर्षीय प्रविण रिमाललाई प्रतिवादी बनाउँदै मुद्दा दायर भएको थियो।
त्यस्तै, बर्दियाको ठाकुरबाबा नगरपालिका–३ बस्ने २६ वर्षीय सन्तोष भनिने सविनजंग शाही, सोही जिल्लाको गरूवा गाउँपालिकाका २२ वर्षीय हेमन्त शाही, सोही जिल्लाको राजापुर नगरपालिका– ७ घर भई टीकापुर बस्दै आएका २१ वर्षीय रोहित आले, टीकापुरका २५ वर्षीय सोहन शाह, बर्दगोरिया गाउँपालिका– २ का २५ वर्षीय लोकेन्द्र कुँवर, लम्कीचुहा नगरपालिका– ३, चिसापानीका २६ वर्षीय अनुज भनिने चिरञ्जीविजंग शाही, सोही ठाउँका २६ हिमाल शाहीका बिरुपनि मुद्दा दायर भएको थियो।
त्यस्तै कैलालीको जानकी गाउँपालिका–६ का २८ वर्षीय जयन्द्र शाह, टीकापुर – १ का २७ वर्षीय विकास शेरचन, टीकापुर –६ का ३५ वर्षीय अशोक रावल, लम्कीचुहा– ४ का २४ वर्षीय रोशनबहादुर शाही, लम्कीचुहा –३ का २५ वर्षीय लोकजंग शाही गरी २१ जनालाई प्रतिवादी बनाई अदालतमा मुद्दा दायर भएको थियो। यीमध्ये ६ जनालाई जीवन रहँदासम्म, ७ जनालाई जन्मकैदको सजाय सुनाइएको छ।
त्यस्तै, थप ७ जनाले भने सफाइ पाएका छन्। सुरूदेखि नै फरार रहेका एक जना भने अझै फरारकै सूचीमा छन्। उनको हकमा अदालतले मुद्दा मुलतबीमा राखेको छ।
के थियो हत्याको कारण?
कैलाली लम्कीचुहाका युवा भूपेन्द्र बडुवालको हत्याको मुख्य कारण दुई समूह बीचको विवाद तथा रिसइबीलाई प्रहरीले मुख्य कारण मानेको छ।
कैलालीका तत्कालीन प्रहरी प्रमुख एसपी विश्व अधिकारीले झन्डै एक महिना पछि मंसिर २० गते सार्वजनिक गरेको विवरण अनुसार खोला तथा नदीजन्य पदार्थका साथै स्थानीय वन पैदावारमा आ–आफ्नो हैकम जमाउने सोचले भएको रिसइबीका कारण बडुवालको हत्या घटना भएको निष्कर्ष सुनाएका थिए।
अधिकारीका अनुसार केही वर्ष पहिलेदेखि चिसापानी, टीकापुर र लम्की क्षेत्रमा नदीजन्य पदार्थ तथा वन पैदावारको ठेक्कापट्टामा आपराधिक गिरोह सक्रिय थिए।
सुरूमा आपसमा इजी मनीका लागि मिलेर खोला तथा नदीजन्य पदार्थ र वन पैदावारमा काम गर्ने समूहका बीचमा भागबण्डा र लालचकै कारण दुई चिरा परेपछि बडुवाल हत्या घटना भएको प्रहरीको निष्कर्ष थियो।
सुरूमा एकै समूहका जानकी गाउँपालिका–६ जगतपुरका जयन्द्र शाह र लम्कीचुहा–३ का नवीन रावलबीच सोही रकम बाँडफाँटमा कसको हिस्सा बढी हुने वा कस्को वर्चश्व रहने भन्ने विषयलाई लिएर मनमुटाव बढेपछि आपसमा दुई समूहका बीचमा बडुवाल हत्याभन्दा पहिले पनि पटक–पटक लफडा भएको पाइएको प्रहरी प्रतिवेदनमा उल्लेख थियो।
जयन्द्र शाह र नवीन रावलको समूहमा आपसी मतभेद र मनमुटावकै कारण बडुवालको हत्या भएको प्रहरीले बताएको थियो।
अर्को समूहले करिब २ किलोमिटर टाढासम्म लखेटेपछि बडुवाल ज्यान जोगाउन सिद्धार्थ होटल नजिकबाट मोटरसाइकल छोडेर आफन्तको घरतर्फ दौडिँदै गर्दा उनीमाथि पछाडिबाट खुकरी, खुँडा जस्ता धारिलो हतियार प्रहार भएको थियो। जतिखेर उनी स्थानीय स्तरमा आयोजित फुटबल प्रतियोगिता हेरेर फर्किँदै थिए।
यो घटना २०७८ कात्तिक २३ गते राति ८ बजेर ५२ मिनेटमा घटेको थियो।
टीकापुर नगरपालिका – १ को ब्लक नं. २९ स्थित सिद्धार्थ होटल नजिक रहेको स्थानीय कौशीदेवी विष्टको घर आँगनमा बडुवालमाथि धारिलो हतियार प्रहार भएको एसपी अधिकारीले तत्कालीन समय सार्वजनिक गरेको रिपोर्टमा उल्लेख थियो।
गम्भीर अवस्थाका घाइते बडुवालाई प्रहरीले तत्काल उद्धार गरि टीकापुर अस्पतालमा पुर्याए पनि राति साढे ९ बजेतिर उनलाई चिकित्सकले मृत घोषणा गरेका थिए।
-1746009348.jpg)
