लमहीस्थित सम्राट सिमेन्ट उद्योगमा माटोको ढिस्कोले एक जना श्रमिकको पुरिएर मृत्यु भएको छ। अर्का एक जना घाइते छन्।
उनलाई थप उपचारका लागि बाँकेको नेपालगञ्ज पठाइएको छ।
लमही नगरपालिका–७ कमानपुरका ३६ वर्षीय अरविन्द चौधरीको माटोको ढिस्कोले पुर्दा मृत्यु भएको जिल्ला प्रहरी प्रवक्ता डिएसपी चक्रबहादुर शाहले बताए।
सोही घटनामा परी लमही–७ हस्नापुरका २७ वर्षीय शंकर चौधरी घाइते छन्।
लमहीमा प्रारम्भिक उपचारपछि थप उपचार लागि उनलाई बाँकेको नेपालगञ्जका लागि रिफर गरिएको छ।
शंकरको अवस्था मध्यम रहेको प्रहरीले जानकारी दिएको छ।
प्रहरीका अनुसार अनुसार लमही – ७ स्थित सम्राट सिमेन्ट कम्पनी प्रालिभित्र काम गर्ने क्रममा सोमबार अपराह्न साढे ४ बजेतिर माटोको ढिस्को खसेर चौधरीद्वयलाई पुरेको थियो। उनलाई उद्धार गरी लमही अस्पतालमा पुर्याउँदा चिकित्सकले मृत घोषणा गरेका थिए।
जिल्ला प्रहरी प्रवक्ता शाहका अनुसार सिमेन्ट परिसरभित्र सोमबार बिहान अर्थिङको तार बिच्छाउन भनेर डोजरले खाडल खनिएको थियो। सोही खाडलमा तार बिच्छाइरहेको अवस्थामा माथिबाट माटोको ढिस्को खसेर उनीहरूलाई पुरेको थियो।
घटनाबारे सूचना पाउनासाथ अस्थायी प्रहरी पोष्ट बन्गैबाट प्रहरी सहायक निरीक्षक लक्कु चन्दको नेतृत्वमा प्रहरी घटनास्थल पुगेको थियो। प्रहरीले स्थानीय र सिमेन्ट उद्योगका कर्मचारी समेतको सहयोगमा उनीहरूको उद्धारपछि अस्पताल पुर्याएको थियो।
घटना अनुसन्धानका लागि इलाका प्रहरी कार्यालय अमेलियाबाट प्रहरी निरीक्षक रेशमबहादुर खत्रीको नेतृत्वमा थप १२ जनाको टोली घटनास्थलमा खटाइएको छ।
-1746009348.jpg)
