राष्ट्रिय स्वतन्त्र पार्टी (रास्वपा) का धादिङ क्षेत्र-१ का उम्मेदवार आशिका तामाङ निर्वाचन अधिकृतको कार्यालय धादिङमा पुगेर उम्मेदवारी फिर्ताको लागि इमेल आफूले नपठाएको बताएकी छन्।
शुक्रबार बिहान १० बजेदेखि १ बजेसम्मका लागि उम्मेदवारी फिर्ताको समय तोकिएको थियो। त्यस अवधिमा निर्वाचन अधिकृतको कार्यालयमा आशिका तामाङको नामबाट उम्मेदवारी फिर्ता गर्ने भन्दै इमेल गएको थियो।
दिउँसो ३ बजेतिर उनी धादिङस्थित निर्वाचन अधिकृतको कार्यालयमा पुगेर सनाखत गराएकी हुन्।
‘म सशरीर उपस्थित भएको छु। मैले इमेल गरेको होइन, मेरो उम्मेदवारी कायमै गरी पाऊँ भनेर भन्नुभएको छ। उहाँको उम्मेदवारी कायम नै रहन्छ,’ निर्वाचन अधिकृत एकराज अधिकारीले भने।
यसअघि निर्वाचन अधिकृतको कार्यालयमा प्रतिनिधि सभा निर्वाचन ऐन २०७४ को दफा २५ (१) अनुसार फिर्ता गरीपाऊँ भनेर इमेल गएको थियो। उक्त इमेल कसले गरेको हो भन्ने विषयमा आशिकाले कार्यालयमा खुलाइनन्।
आशिकाले सेतोपाटीसँग कुराकानी गरी उक्त इमेल फेक भएको बताइन्। आफ्नो उम्मेदवारी फिर्ता गराउनका लागि पुराना दलहरूले चलखेल गरेको उनको दाबी छ।
'मैले इमेल गरेकी होइन। इमेल फेक हो। मेरो उम्मेदवारी रद्द गर्न पुराना दलहरूले चलखेल गरिरहेका छन्,' उनले भनिन्।
सामाजिक सञ्जाल र विभिन्न पत्रपित्रकामा आफूलाई जर्मन स्थायी आवासीय अनुमति पत्र सार्वजनिक गरेको थियो। उक्त विवाद आएपछि उम्मेदवारी फिर्ताको चर्चा चलेको हो।
-1746009348.jpg)
