पर्यटक भिसामा नेपाल आएर भिसाको उद्देश्य विपरीत गतिविधि गरेको आरोपमा एक नाबालक सहित १० जना विदेशी नागरिकलाई नेपालबाट निष्कासन गर्ने निर्णय गरिएको छ।
अध्यागमन कानुन उल्लङ्घन गरेको कसुरमा उनीहरूलाई जनही ५० हजार रुपैयाँ जरिवाना गरी निष्कासन गर्ने निर्णय गरिएको हो।
साथै, उनीहरूलाई तीन वर्षसम्म नेपाल पुनः प्रवेश गर्न नपाउने गरी प्रतिबन्ध लगाइएको छ।
मोरङको कानेपोखरी गाउँपालिका–७, बरगाछीस्थित ‘मर्सी डेभलपमेन्ट’ नामक संस्थाले आयोजना गरेको कार्यक्रममा सहभागी हुन आएका उनीहरूले पर्यटक भिसाको उद्देश्य विपरीत कार्य गरेको पाइएको हो।
निष्कासनमा पर्नेमा संयुक्त राज्य अमेरिकाका पाँच, ब्राजिलका दुई र क्यानडाका तीन जना नागरिक छन्। उनीहरूमध्ये एक जना नाबालकसमेत रहेका छन्।
नाबालकलाई भने उनका आमाबुवासँगै नेपालबाट प्रस्थान गराउने निर्णय गरिएको छ।
