एनआरएनए क्यानडाका उपाध्यक्ष तथा नेप्लिज क्यानेडियन क्रिकेट क्लबका पूर्वअध्यक्ष किरोज श्रेष्ठ उत्कृष्ट एसियन क्यानेडियन अवार्डबाट सम्मानित भएका छन्।
क्यानडाको बहुसांस्कृतिक परिषद (सीएमसी) ले क्यानडाको समूदायमा गरेको योगदानको कदर श्रेष्ठलाई उत्कृष्ट एसियाली क्यानेडियन अवार्ड २०२४ प्रदान गरेको हो।
श्रेष्ठले एनआरएनए क्यानडाको उपाध्यक्षको रूपमा आफ्नो भूमिकामा नवआगन्तुक र अन्तर्राष्ट्रिय नेपाली विद्यार्थीहरूले सामना गर्ने विभिन्न समस्याहरू समाधान गर्न महत्त्वपूर्ण भूमिका खेल्दै आएका छन्।
उनले धेरै नयाँ आउनेहरूलाई क्यानाडाको रोजगार बजारमा एकीकृत गर्न मद्दत गर्दै एक सल्लाहकारको रूपमा पनि सेवा गरेका छन्। यसअघि चितवन सोसाइटी क्यानडाको कोषाध्यक्षको हैसियतमा श्रेष्ठले कोभिड-१९ को समयमा नेपाललाई चिकित्सा र आर्थिक सहयोग प्रदान गर्न सक्रिय थिए।
२०१९-२०२१ र २०२१-२०२३ का लागि नेप्लीज क्यानेडियन क्रिकेट क्लब (एनसीसीसी) को अध्यक्षका रूपमा श्रेष्ठको कामलाई क्यानडामा रहेका नेपाली समूदायले प्रशंसा गरेका थिए। आफ्नो अध्यक्षताको समयमा उनले नेपाली राष्ट्रिय क्रिकेट टोली र क्यानडा बीचको पहिलो द्विपक्षीय शृंखला आयोजना गर्न महत्त्वपूर्ण भूमिका खेलेका थिए। दुवै देशका अधिकारीहरूलाई सहजीकरण गरेका थिए।
श्रेष्ठले आफूलाई अवार्डका लागि मनोनयन गरेकोमा नेपाली समुदाय र क्यानडाली बहुसांस्कृतिक परिषद्प्रति आभार व्यक्त गरे । उनले यो सम्मानले आगामी दिनमा अझै रचनात्मक र प्रभावकारी रुपमा योगदान पुर्याउन प्रेरणा मिल्ने बताए।
