आइसिसी टी-२० विश्वपकमा लगातार दोस्रो पटक र समग्रमा तेस्रो पटक स्थान बनाउने लक्ष्यमा रहेको नेपाली क्रिकेट टोलीले अहिले युएईमा छ।
मुख्यत: आइसिसी टी-२० विश्वकप २०२६ को एसिया छनोटको तयारीमा रहेको नेपालले शुक्रबारदेखि दुई पटकको टी-२० विश्वकप च्याम्पियन वेस्ट इन्डिजसँग ऐतिहासिक टी-२० सिरिज खेल्दैछ। शुक्रबारको पहिलो खेल शारजाह मैदानमा नेपाली समयअनुसार राति ८:४५ बजे सुरू हुनेछ।
युनिटी कपको नाम दिइएको यो सिरिज नेपालले आइसिसीको स्थायी सदस्यसँग खेल्न लागेको पहिलो द्विपक्षीय सिरिज हो।
एक वर्षअघि वेस्ट इन्डिजको ‘ए’ क्रिकेट टोलीसँग खेलेको नेपालका लागि वेस्ट इन्डिजविरूद्धको खेलमा जित्ने भन्दा पनि सिक्नका लागि महत्वपूर्ण ठानिएको छ। वेस्ट इन्डिजविरूद्ध सिरिज खेलेर तयारी गर्दा नेपालले दुई सातापछि ओमानमा हुने विश्वकप छनोटअघि आत्मविश्वास बटुल्नेछ।
त्यसो त नेपालविरूद्धको सिरिजका लागि वेस्ट इन्डिजले पाँच जना खेलाडीलाई पहिलो पटक राष्ट्रिय टोलीमा स्थान दिएको छ। अनुभवी खेलाडीलाई आराम दिएको वेस्ट इन्डिजविरूद्ध नेपालका लागि आफ्नो क्षमता देखाउने अवसर पनि हुनेछ।
सिरिजअघि नेपालका प्रशिक्षक स्टअर्ट लले राम्रो तयारी गरेको बताए। साथै उनले शारजाहको क्रिकेट मैदान र सुविधाको पनि प्रशंसा गर्दै आफ्ना खेलाडी वेस्ट इन्डिजविरूद्धको खेलका लागि पूर्णरूपमा तयार भएको बताए।
‘एक दिन बाँकी हुँदा हामी आशा गर्छौं कि यूएईमा रहेका नेपालीले आफ्नो टिमलाई समर्थन गर्न आउनुहुनेछ। मैले विश्वभर देखेको तपाईंहरूको समर्थन, जोश र क्रिकेटप्रतिको माया अतुलनीय छ। कृपया हामीलाई समर्थन गर्नुहोस्। हामी तपाईंहरूका लागि उत्कृष्ट प्रदर्शन गर्नेछौं,’ उनले नेपाली क्रिकेट संघसँगको कुराकानीमा भनेका छन्।
नेपालले पहिलो पटक आइसिसीको पूर्ण सदस्यसँग टी-२० सिरिज खेल्न लागेको हो। सिरिज युएईमा हुने भए पनि आयोजक भने नेपाल हो। जसका कारण क्यानका आधा दर्जन कर्मचारीसहित अध्यक्ष चतुरबहादुर चन्द, उपाध्यक्ष रोशन सिंह, कोषाध्यक्ष पदम खड्का र सचिव पारस खड्कासहितका कतिपय केन्द्रीय सदस्यहरू युएई पुगेका छन्।
वेस्ट इन्डिजसँग सिरिज खेले लगत्तै नेपाली टोली त्यतैबाट विश्वकप छनोट खेल्न ओमान जानेछ। ओमानमा सुरुमा नेपालले समूह चरणमा कुवेत र जापानसँग खेल्नेछ। यो समूहबाट शीर्ष दुईमा परे सुपर-६ मा पुग्नेछ। सुपर-६ मा खेल्ने ६ टोलीमध्ये शीर्ष ३ मा पर्न सके नेपालले अर्को वर्ष भारत र श्रीलंकामा हुने टी-२० विश्वकपमा स्थान बनाउनेछ।
ओमानमा तीन समूह नौ टोलीबीच प्रतिस्पर्धा हुनेछ। अरु समूहमा मलेसिया, कतार र युएई तथा ओमान, पिएनजी सामोआ छन्।
तीन समूहका शीर्ष २-२ टोली गरी सुपर-६ मा पुग्ने कुल ६ टोलीमध्ये शीर्ष ३ टोली भएमा नेपाल लगातार दोस्रो पटक र समग्रमा तेस्रो पटक टी-२० विश्वकपमा छनोट हुनेछ।
सिरिजको तालिका
पहिलो टी-२० आई : असोज ११, शारजाह
दोस्रो टी-२० आई: असोज १३, शारजाह
तेस्रो टी-२० आई: असोज १४, शारजाह
नेपाली टोली : रोहित कुमार पौडेल (कप्तान), दीपेन्द्रसिंह ऐरी (उपकप्तान), कुशल भुर्तेल, लोकेस बम, कुशल मल्ल, आसिफ सेख, आदिल अन्सारी, करण केसी, नन्दन यादव, सन्दीप लामिछाने, सन्दीप जोरा, आरिफ सेख, ललितनारायण राजवंशी, गुलशन झा, सोमपाल कामी, साहब आलम।
वेस्ट इन्डिज टोली: अकील हुसेन (कप्तान), फाबियन एलेन, ज्वेल एन्ड्रयू, अकेम अगस्टे, नविन बिदैसी, जेदिया ब्लेड्स, केसी कार्टी, करिमा गोर, जेसन होल्डर, आमिर जन्गु, काइल मेयर्स, ओबेड म्याकोय, जिशान मोतारा,रामोन सिमोन्ड्स, शमर स्प्रिंगर।
-1746009348.jpg)
