फिफा विश्वकप २०२२ र एएफसी एसियन कप २०१३ को छनोट प्रतियोगिताअन्तर्गत अस्ट्रेलियाविरुद्धको खेलका लागि नेपालले राष्ट्रिय टिम घोषणा गरेको छ।
प्रशिक्षक योहान कालिनले घोषणा गरेको नेपाली टिममा गत महिना चाइनिज ताइपेईविरुद्ध खेलेका खेलाडीको बाहुल्यता छ।
घाइते भएर ताइपेईविरुद्धको खेल गुमाएका डिफेन्डर सुमन अर्याल र फरवार्ड नवयुग श्रेष्ठ टिममा फर्किएका छन्। रवि सिलवाल र विमल राना फेरि टिमबाट बाहिरिएका छन्।
समूह 'बी' रहेको नेपालले आफ्नो तेस्रो खेल अस्ट्रेलियासँग खेल्न लागेको हो। खेल क्यानबेरामा असोज २३ गते (१० अक्टोबर) नेपाली समयअनुसार दिउँसो सवा २ बजे (अस्ट्रेलियाको समयअनुसार राति साढे ७ बजे) हुनेछ।
नेपालले पूर्व एसियन च्याम्पियन अस्ट्रेलियासँग पहिलो पटक प्रतिस्पर्धा गर्न लागेको हो। फिफा वरीयतामा ११७ स्थान माथि रहेको अस्ट्रेलियाविरुद्ध खेल्नु नेपालका लागि कठिन चुनौती हुनेछ। फिफा वरीयतामा नेपाल १६१ र अस्ट्रेलिया ४४ स्थानमा छन्।
समूहमा नेपालले अहिलेसम्म २ खेल खेलिसकेको छ। पहिलो खेलमा कुवेतसँग ७-० गोलले पराजित भएको नेपालले दोस्रो खेलमा चाइनिज ताइपेईलाई उसैको घरेलु मैदानमा २-० गोलले पराजित गरेर महत्वपूर्ण ३ अंक जोडेको थियो।
अस्ट्रेलियासँग खेलेपछि नेपालले असोज २८ मा जोर्डनविरुद्ध उसैको घरेलु मैदानमा खेल्नेछ।
समूह 'बी' को अंक तालिकामा २ खेलबाट ३ अंक जोडेको कुवेत पहिलो स्थान, १ खेलबाट ३ अंक जोडेको अस्ट्रेलिया दोस्रो स्थानमा, १ खेलबाट ३ अंक जोडेको जोर्डन तेस्रो स्थानमा र २ खेलबाट ३ अंक जोडेको नेपाल चौथो स्थानमा छन्। सुरुवाती दुवै खेल गुमाएको ताइपेई पुछारमा छ।
नेपाली टिम
गोलकिपर : किरण चेम्जोङ (कप्तान), विकेश कुथु र विशाल श्रेष्ठ
डिफेन्डर : सरोज दाहाल, अजित भण्डारी, दिनेश राजवंशी, अनन्त तामाङ, देवेन्द्र तामाङ, रजिन धिमाल, सुमन अर्याल
मिडफिल्डर : सुनील बल, रवि पासवान, अन्जन विष्ट, सुजल श्रेष्ठ, हेमन गुरुङ, विक्रम लामा, तेज तामाङ, सन्तोष तामाङ, विशाल राई, रोहित चन्द
फरवार्ड : विमल घर्तीमगर, अभिषेक रिजाल, नवयुग श्रेष्ठ
