स्पेनिस ला लिगाको उपाधि होड थप रोमाञ्चक बनेको छ। भिल्लारियललाई २-० ले पराजित गर्दै रियल म्याड्रिड बार्सिलोनालाई पछि पार्दै तालिकाको शीर्ष स्थानमा पुगेको छ। रियलको जितमा स्टार स्ट्राइकर केलियन एमबाप्पेले दुई गोल गरे।
खेलको पहिलो हाफ प्रतिस्पर्धात्मक भए पनि दुवै टोलीले गोल गर्न सकेका थिएनन्। तर, दोस्रो हाफको सुरुवातमै एमबाप्पेले गोल गर्दै रियललाई अग्रता दिलाए।
भिनिसियस जुनियरको पासलाई भिल्लारियलका डिफेन्डरले क्लियर गर्न खोज्दा आएको बललाई एमबाप्पेले गोलमा परिणत गरेका थिए। खेलको इन्जुरी समयमा एमबाप्पेले नै पेनाल्टीमार्फत दोस्रो गोल गर्दै टोलीको जित सुनिश्चित गरे। यो सिजन १९ लिग खेलमा उनको गोल संख्या २१ पुगेको छ।
एमबाप्पेले आफ्नो पेनाल्टी गोल टिममेट ब्राहिम डियाजलाई समर्पित गरेको बताएका छन्। डियाजले गत हप्ता मात्र मोरक्कोका लागि अफ्रिका कप अफ नेसन्सको फाइनलमा पेनाल्टी मिस गरेका थिए, जसका कारण उनको टोली सेनेगलसँग पराजित भएको थियो। डियाजको मनोबल बढाउन एमबाप्पेले 'पानेन्का' शैलीमा पेनाल्टी प्रहार गरेका थिए।
नयाँ प्रशिक्षक अल्भारो आर्बेलोआको नेतृत्वमा रियल म्याड्रिडले लय समात्दै लगातार तीन खेल जितेको छ। जाबी अलोन्सोको स्थानमा आएका आर्बेलोआले सुरुवाती खेलमा हार बेहोरे पनि अहिले टोलीलाई शीर्ष स्थानमा पुर्याएका छन्। अर्कोतर्फ, भिनिसियस जुनियरको ला लिगामा गोल गर्न नसकेको यात्रा भने १३ खेल पुगेको छ।
हाल रियल म्याड्रिड तालिकामा २ अंकको अग्रतासहित शीर्ष स्थानमा छ। यद्यपि, आइतबार पुछारको टोली रियल ओभिएडोविरुद्ध हुने खेल जितेमा बार्सिलोना पुनः शीर्ष स्थानमा फर्कने सम्भावना छ।
-1746009348.jpg)
