अखिल नेपाल फुटबल संघ (एन्फा) ले आचार संहिताविपरित केन्द्रीय कार्यसमितिको निर्वाचन गर्न लागेको भन्दै उजुरी परेपछि स्पष्टीकरण सोधिएको छ।
यसअघि केन्द्रीय सदस्य रुपेश अधिकारीले एन्फाले प्रतिनिधि सभाको निर्वाचनको आचार संहिता माघ ५ गतेबाट लागू भए पनि एन्फाले निर्वाचन प्रक्रिया अघि बढाएको भन्दै उजुरी दिएका थिए।
सो उजुरीपछि निर्वाचन आयोगले स्पष्टीकरण सोध्दै एन्फालाई पत्र पठाएको थियो। तर उक्त पत्र एन्फाले बुझ्न नमानेको निर्वाचन आयोग स्रोतको भनाइ छ।
एन्फाले स्पष्टीकरण पत्र बुझ्न नमानेपछि निर्वाचन आयोगले इमेलमार्फत् स्पष्टीकरण पठाउने तयारी गरेको छ। स्पष्टीकरणपछि एन्फाले निर्वाचन गर्ने बताएमा अर्को पत्र पठाउने निर्वाचन आयोग स्रोतको भनाइ छ।
‘एन्फाको निर्वाचन रोकिएको भन्ने पनि सुन्नमा आएको छ। यदि निर्वाचन प्रक्रिया अघि बढेमा त्यसलाई रोक्नका लागि अर्को पत्र पठाइनेछ’ आयोग स्रोतले भन्यो।
आगामी माघ २८ गते झापामा एन्फाको कार्यसमितिका लागि निर्वाचन हुने तय भए पनि अहिले स्थगित भएको अवस्था छ।
गत माघ ६ गते एन्फाको निर्वाचन समितिका सदस्य सचिव लोकेन्द्र ओलीले सूचना निकाल्दै निर्वाचन प्रक्रिया स्थगित गरेका थिए।
उनले जारी गरेको सूचनामा भनिएको छ, ‘उच्च अदालत पाटनबाट मिति २०८२/१०/०४ गते निर्वाचन सम्बन्धी प्रक्रिया यथास्थितिमा राख्नु भनी जारी भएको अन्तरिम आदेशको म्याद/सूचना मिति २०८२/१०/०६ मा निर्वाचन समितिलाई प्राप्त भएकाले मिति २०८२/१०/०६ गते देखिका निर्वाचन कार्यक्रम अर्को सूचना जारी नभएसम्मा लागि स्थगित गरिएको छ।’
यसअघि जिल्लादेखिको निर्वाचन नगरी एकैपटक केन्द्रीय समितिको निर्वाचन गर्न लागिएको भन्दै उच्च अदालत पाटनमा दुई वटा रिट परेको थियो। दुवै रिटमा अदालतले निर्वाचन प्रक्रिया यथास्थितिमा राख्नका लागि अन्तरिम आदेश दिएको थियो।
साथै राष्ट्रिय खेलकुद परिषदले पनि विधान संशोधन गरेर मात्र निर्वाचन गर्न एन्फालाई निर्देशन दिएको थियो। तर एन्फाले आफू स्वायत्त निकाय भएको भन्दै निर्वाचन प्रक्रिया लगातार अघि बढाएको थियो।
अदालतको आदेश र खेलकुद परिषदको निर्देशन विपरित एन्फाको २१ सदस्यीय कार्यसमितिका लागि उम्मेदवारहरुको मनोनयन समेत दर्ता भएको थियो। हालका अध्यक्ष पंकजबिक्रम नेम्बाङ र उपाध्यक्ष दीर्घबहादुर केसी प्यानलसहित प्रतिस्पर्धामा उत्रने तयारी छ।
-1746009348.jpg)
