नेपालको यू-२० महिला टोली र चीनको युनान युथ महिला टोलीबीच दशरथ रंगशालामा प्रतिस्पर्धा हुने

सेतोपाटी संवाददाता

काठमाडौं, माघ १२

नेपाली राष्ट्रिय यू-२० महिला फुटबल टोली र चीनको युनान यूथ महिला टोलीबीच अन्तर्राष्ट्रिय मैत्रीपूर्ण फुटबल खेल आयोजना हुने भएको छ।

खेल आगामी माघ १७ गते दशरथ रंगशालामा हुने भएको हो।

यो खेल अखिल नेपाल फुटबल संघ (एन्फा) र चीनको युनान विश्वविद्यालयको शारीरिक शिक्षा संकाय तथा नेपाल ओभरसिज चिनियाँ संघको संयुक्त आयोजनामा, तथा नेपालस्थित चिनियाँ राजदूतावास र राष्ट्रिय खेलकुद परिषद्‌को समन्वयमा हुन लागेको हो।

चिनियाँ नयाँ वर्षको उपलक्ष्यमा आयोजना गरिन लागेको यस खेलले नेपाली यू-२० महिला टोलीको तयारी तथा अन्तर्राष्ट्रिय अनुभव अभिवृद्धि गर्ने अपेक्षा गरिएको छ। खेलाडीलाई अन्तर्राष्ट्रिय स्तरको प्रतिस्पर्धात्मक वातावरणमा खेल्ने अवसर प्रदान गर्नुका साथै नेपाली महिला फुटवलको समग्र विकासमा महत्वपूर्ण योगदान पुऱ्याउने एन्फाको विश्वास छ।

खेलअघि नेपाल र चीनका विभिन्न सांस्कृतिक विविधता झल्काउने सांस्कृतिक प्रस्तुती पनि प्रस्तुत गरिने कार्यक्रम रहेको छ।

उक्त खेलका लागि चिनियाँ टोली २०२६ जनवरी २९ मा नेपाल आइपुग्नेछ। एन्फाले विगत तीन वर्षदेखि नेपाल र चिनियाँ युवा टोलीहरूबीच यस प्रकारका मैत्रीपूर्ण खेलहरूको आयोजना गर्दै आइरहेको छ।