इंग्ल्याण्डका स्ट्राइकर ट्यामी अब्राहम १८.२५ मिलियन पाउण्डमा टर्किस क्लब बेसिकटासबाट एस्टन भिल्ला फर्किएका छन्। २८ वर्षीय अब्राहमले प्रिमियर लिगको उपाधि दाबेदार भिल्लासँग साढे चार वर्षको सम्झौता गरेका छन्। सन् २०२१ मा रोमा गएपछि उनी पहिलोपटक इंग्ल्याण्ड फर्किएका हुन्।
अब्राहम रोमाबाट रनमा बेसिकटासमा खेलिरहेका थिए, तर टर्किस क्लबले सोमबार ११ मिलियन पाउण्ड तिरेर उनलाई स्थायी रूपमा किन्ने विकल्प प्रयोग गर्यो। त्यसैले, अब्राहमलाई भिल्ला ल्याउन एस्टन भिल्लाले बेसिकटासलाई २१ मिलियन युरो (१८.२५ मिलियन पाउण्ड) तिर्ने भएको छ।
भिल्लाका प्रशिक्षक उनाइ इम्री आफ्ना मुख्य स्ट्राइकर ओली वाटकिन्सलाई साथ दिने अर्को स्ट्राइकरको खोजीमा थिए। उनको नजर लामो समयदेखि अब्राहममाथि थियो। अब्राहमले यसअघि २०१८-१९ को सिजनमा लोनमा भिल्लाबाट खेल्दै ४० खेलमा २६ गोल गरेर टोलीलाई दोस्रो डिभिजन (च्याम्पियनसिप) बाट प्रिमियर लिगमा बढुवा गराउन मुख्य भूमिका खेलेका थिए।
क्लब फर्किएपछि अब्राहमले भने, "केही क्लबहरू तपाईंको खेल जीवनको ठूलो हिस्सा बन्छन् र सधैं मनमा रहन्छन्। मैले गोल गरेको छु, चुनौतीहरूको सामना गरेको छु र एक खेलाडी तथा व्यक्तिका रूपमा परिपक्व भएको छु। म एस्टन भिल्ला फर्किएको छु र टोलीका लागि आफ्नो तर्फबाट सबैथोक दिन तयार छु।"
यसै सम्झौताको एक हिस्साको रूपमा भिल्लाका युवा मिडफिल्डर यासिन ओज्कान बेसिकटास जाने भएका छन्। भिल्लाका फुटबल सञ्चालन अध्यक्ष रोबर्टो ओलाबेले आफैं टर्की पुगेर अब्राहमको खेल अवलोकन गरेका थिए।
अब्राहमले आगामी आइतबार ब्रेन्टफोर्ड विरुद्धको खेल खेल्न सक्नेछन्, तर बिहीबार हुने रेड बुल साल्जबर्ग विरुद्धको युरोपा लिग खेलका लागि भने उनको नाम दर्ता नभएकाले खेल्न पाउने छैनन्।
यसैबीच, भिल्लाका पूर्व मिडफिल्डर डगलस लुइज पनि ऋणमा क्लब फर्कने तयारीमा छन्। २७ वर्षीय ब्राजिलियन खेलाडी लुइज हाल युभेन्ट्सबाट नटिङ्घम फरेस्टमा लोनमा छन्, तर सोमबारको ट्रान्सफर विन्डो बन्द हुनुअघि नै उनी भिल्ला फर्कने बुझिएको छ।
गत आइतबार न्युकासललाई २-० ले हराएपछि एस्टन भिल्ला प्रिमियर लिगको तेस्रो स्थानमा उक्लिएको छ। उनीहरू शीर्ष स्थानको आर्सनलभन्दा मात्र चार अंकले पछि छन्।
-1746009348.jpg)
