कार्डिफमा भएको विश्वकप प्ले-अफ सेमिफाइनलमा बोस्निया-हर्जगोभिनासँग पेनाल्टी सुटआउटमा पराजित भएपछि वेल्सको लगातार दोस्रो पटक ठूलो प्रतियोगिता खेल्ने सपना टुटेको छ। दुई वर्षअघि पोल्याण्डसँग युरो २०२४ को छनोटमा व्यहोरेकै हारको पीडा वेल्सले पुनः भोग्नुपर्यो।
क्रेग बेलामीको प्रशिक्षणमा रहेको वेल्सको टोली खेलको दोस्रो हाफसम्म १-० ले अगाडि थियो। तर अन्तिम समयमा गोल खानु र पेनाल्टीमा हार्नु वेल्सका लागि दुर्भाग्यपूर्ण बन्यो।
खेलको पहिलो हाफमा वेल्सको दबदबा थियो। ह्यारी विल्सनको एउटा उत्कृष्ट प्रहार पोलमा लागेर फर्किएको थियो। दोस्रो हाफ सुरु भएको ६ मिनेटमै ड्यानियल जेम्सले २५ यार्ड टाढाबाट एक सनसनीपूर्ण गोल गर्दै वेल्सलाई १-० को अग्रता दिलाए। त्यसपछि पनि जेम्सको अर्को प्रहार बारमा लाग्यो भने वेल्सका गोलकिपर कार्ल डार्लोले विपक्षीको एउटा निश्चित गोल बचाएर टोलीलाई जोगाइराखेका थिए।
तर, खेल सकिन ४ मिनेट मात्र बाँकी छँदा बोस्नियाका ४० वर्षीय अनुभवी कप्तान एडिन जेकोले कर्नरबाट आएको बललाई हेडमार्फत गोलमा परिणत गर्दै खेल १-१ को बराबरीमा ल्याए। थप गरिएको समय (एक्स्ट्रा टाइम) मा दुवै टोली थकित देखिए र कुनै गोल हुन नसकेपछि खेल पेनाल्टी सुटआउटमा पुग्यो।
पेनाल्टी सुटआउटमा वेल्सका ब्रेनन जोनसनको प्रहार आकाशियो भने नेको विलियम्सको प्रहार बोस्नियाका गोलकिपरले बचाए। अन्ततः बोस्नियाले जित निकाल्दै फाइनलमा स्थान पक्का गर्यो।
अब बोस्नियाले आगामी मंगलबार इटालीसँग खेल्नेछ। यो खेल जित्ने टोलीले अमेरिका, क्यानडा र मेक्सिकोमा हुने विश्वकपमा स्थान पाउनेछ। यता पराजित वेल्सले भने सोही दिन नर्दन आयरल्याण्डसँग एक मैत्रीपूर्ण खेल खेल्नेछ, जुन खेलको नतिजाले विश्वकप छनोटमा कुनै असर गर्ने छैन।
