चार पटकको विश्व विजेता इटाली लगातार तेस्रो पटक विश्वकप फुटबलमा छनोट हुन असफल भएको छ।
बोस्निया-हर्जगोभिनासँग पेनाल्टी सुटआउटमा स्तब्धकारी हार बेहोरेपछि इटालीको विश्वकप यात्रा समाप्त भएको हो।
यसअघि कुनै पनि विश्व विजेता टोली लगातार तीन पटक विश्वकपमा छानिन असफल भएको इतिहास थिएन। इटाली सन् २०१८ (रुस) र २०२२ (कतार) को विश्वकपमा पनि छनोट हुन सकेको थिएन।
खेलको १५औँ मिनेटमा मोइस केनको गोलबाट इटालीले सुरुवाती अग्रता लिएको थियो। तर, खेलको ४०औँ मिनेटमा इटालीका डिफेन्डर एलेसान्द्रो बास्तोनीले रातो कार्ड खाएर मैदान छाड्नु परेपछि इटाली १० खेलाडीमा सीमित भयो।
दोस्रो हाफमा बोस्नियाले कडा दबाब दियो। खेलको ७९औँ मिनेटमा ह्यारिस ताबाकोभिचले गोल गर्दै खेल १-१ को बराबरीमा ल्याए। निर्धारित र थप गरिएको समयमा अरू गोल हुन नसकेपछि खेल पेनाल्टी सुटआउटमा पुग्यो। पेनाल्टीमा इटालीका पियो एस्पोसिटो र ब्रायन क्रिस्टान्टेले गोल गर्न सकेनन्, जबकि बोस्नियाका सबै खेलाडीले गोल गरे।
यो जितसँगै ४० वर्षीय कप्तान एडिन जेकोको टोली बोस्निया इतिहासमा दोस्रो पटक विश्वकपका लागि छनोट भएको छ।
अब उसले विश्वकपको समूह 'बी' मा क्यानडा, कतार र स्विट्जरल्याण्डसँग प्रतिस्पर्धा गर्नेछ।
हारपछि इटालीका प्रशिक्षक जेन्नारो गाटुसो निकै भावुक देखिए। उनले भने, 'यो हारले मुटु दुखाएको छ। हामीले यो जित आफ्नो लागि मात्र होइन, पूरै इटालीका लागि चाहेका थियौँ। यो पीडा पचाउन निकै गाह्रो छ।'
इटालियन फुटबल महासंघका अध्यक्ष ग्याब्रिएल ग्राभिनाले यसलाई इटालियन फुटबलको 'गहिरो संकट' भनेका छन्।
यद्यपि, उनले गाटुसोलाई प्रशिक्षक पदमै रहिरहन आग्रह गरेका छन्।
सन् २००६ मा विश्वकप जितेयता इटालीको प्रदर्शन लगातार खस्किएको छ। सन् २०१० र २०१४ मा इटाली समूह चरणबाटै बाहिरिएको थियो। युरो २०२० को उपाधि जिते पनि त्यो सफलतालाई इटालीले टिकाइराख्न सकेन।
इटाली मात्र होइन, इतिहासमा अन्य ठूला टोली पनि विश्वकपमा छानिन असफल भएका छन्।
अर्जेन्टिना (१९७०) : साविक विजेता भएर पनि सन् १९७० को विश्वकपमा छानिन सकेको थिएन। इङ्ल्यान्ड (१९७४): सन् १९६६ को विजेता इङ्ल्यान्ड १९७४ को विश्वकपमा पुग्न असफल भएको थियो। नेदरल्यान्ड्स (१९८२): सन् १९७४ र १९७८ को फाइनल पुगेको नेदरल्यान्ड्स १९८२ मा छनोट हुन सकेन।
