सन् २०२६ मा क्यानडा, अमेरिका र मेक्सिकोमा आयोजना हुने विश्वकप फुटबलमा विश्वका केही चर्चित खेलाडीहरू देख्न पाइने छैन।
पोल्याण्डका स्ट्राइकर रोबर्ट लेवान्डोस्कीदेखि इटालीका गोलकिपर डोनारुम्मासम्मका स्टार यसपटक विश्वकपमा छनोट हुन असफल भएका छन्।
यी हुन् विश्वकपमा नदेखिने ६ चर्चित खेलाडीहरू:
१. रोबर्ट लेवान्डोस्की (पोल्याण्ड )
३७ वर्षीय बार्सिलोनाका स्ट्राइकर लेवान्डोस्कीका लागि यो सम्भवतः अन्तिम विश्वकप खेल्ने मौका थियो। तर, प्ले-अफको फाइनलमा पोल्याण्ड स्वीडेनसँग ३-२ ले पराजित भएपछि उनको सपना अधुरै रह्यो। क्लब फुटबलमा बायर्न म्युनिख र बार्सिलोनाबाट धेरै उपाधि जितेका लेवान्डोस्कीले आफ्नो देशका लागि ८९ गोल गरिसकेका छन्।
२. जियानलुइजी डोनारुम्मा (इटाली)
इटालीलाई 'युरो २०२०' को उपाधि जिताउन मुख्य भूमिका खेलेका गोलकिपर डोनारुम्मा पनि यसपटक विश्वकपमा हुने छैनन्। इटाली बोस्निया-हर्जगोभिनासँग पेनाल्टी सुटआउटमा पराजित भएपछि उनी लगातार दोस्रो पटक विश्वकपबाट बाहिरिएका हुन्। हाल उनी म्यानचेस्टर सिटीका भरपर्दा गोलकिपर हुन्।
३. सेरहु गिरेसी (गिनी)
जर्मन लिगमा पछिल्लो समय गोलको वर्षा गरिरहेका स्ट्राइकर हुन् गिरेसी। तर, उनको देश गिनी अफ्रिकी छनोटको पहिलो चरणबाटै बाहिरियो। आफ्नो समूहमा कमजोर प्रदर्शन गरेपछि गिरेसी जस्ता लयमा रहेका खेलाडीलाई पनि यसपटक विश्वकपमा देख्न पाइने छैन।
४. खिचा क्वारात्स्खलिया (जर्जिया)
पेरिस सेन्ट जर्मेनका यी स्टार खेलाडीले क्लब फुटबलमा उत्कृष्ट प्रदर्शन गर्दै बालोन डी'ओरको सूचीमा १२औँ स्थान बनाएका थिए। तर, उनको देश जर्जियाले विश्वकप छनोटमा निकै खराब प्रदर्शन गर्यो। जर्जियाले आफ्नो समूहमा जम्मा ३ अंक मात्र बटुल्न सकेपछि उनको टोली बाहिरियो।
५. भिक्टर ओसिमहेन (नाइजेरिया)
नापोलीलाई इटालीको लिग जिताएका र हाल टर्कीको गालाटासारेमा तहल्का मच्चाइरहेका स्ट्राइकर ओसिमहेन पनि विश्वकपमा हुने छैनन्। नाइजेरिया पेनाल्टी सुटआउटमा डीआर कंगोसँग स्तब्धकारी रूपमा पराजित भएपछि ओसिमहेनको विश्वकप खेल्ने सपनामा पूर्णविराम लाग्यो।
६. डोमिनिक जोबोस्लाई (हंगेरी)
लिभरपुलका प्रभावशाली मिडफिल्डर जोबोस्लाईले यो सिजन उत्कृष्ट खेल देखाइरहेका छन्। तर, छनोट चरणको अन्तिम खेलमा आयरल्याण्डसँग इन्जुरी समयमा गोल खाएर हंगेरी पराजित भएपछि जोबोस्लाईको टोली प्रतियोगिताबाट बाहिरियो।
