आर्सनलको इंग्लिस प्रिमियर लिग उपाधि जित्ने सपनामा ठूलो धक्का लागेको छ। आफ्नै मैदानमा शनिबार भएको खेलमा बर्नमाउथसँग आर्सनल २-१ ले स्तब्ध भएपछि उपाधि यात्रामा असर गर्ने भएको हो।
खेलको सुरुमै जुनियर क्रुपीले गोल गर्दै बर्नमाउथलाई अग्रता दिलाएका थिए। त्यसपछि आर्सनलका भिक्टर ग्योकेरेसले पेनाल्टीमार्फत गोल गर्दै खेललाई १-१ को बराबरीमा ल्याए। तर, दोस्रो हाफमा बर्नमाउथका एलेक्स स्कटले उत्कृष्ट गोल गरेपछि आर्सनल खेलमा फर्कन सकेन र हार बेहोर्नु पर्यो।
यो खेल जितेको भए आर्सनलले दोस्रो स्थानको म्यानचेस्टर सिटीसँगको दूरी १२ अंकले बढाउन सक्ने थियो। तर हारले गर्दा अब म्यानचेस्टर सिटीलाई फाइदा पुगेको छ। सिटीले आर्सनलको तुलनामा दुई खेल कम खेलेको छ र आउँदो हप्ता आर्सनलले सिटीकै मैदानमा गएर खेल्नुपर्नेछ।
यो महत्त्वपूर्ण खेलमा आर्सनलका स्टार खेलाडीहरू बुकायो साका, कप्तान मार्टिन ओडेगार्ड र जुरियन टिम्बर चोटका कारण उपलब्ध थिएनन्। मुख्य खेलाडीहरू नहुँदा आर्सनलको आक्रमण फितलो देखिएको थियो। प्रशिक्षक मिकेल आर्टेटाले १६ वर्षीय युवा खेलाडी म्याक्स डोम्यानलाई समेत मैदान उतारेर नतिजा बदल्ने कोसिस गरे पनि त्यो सफल हुन सकेन।
लगातार तीन सिजन दोस्रो स्थानमा चित्त बुझाएको आर्सनलका समर्थकहरू यसपालि उपाधि जित्ने आशामा थिए। तर यो हारले उनीहरूमा फेरि निराशा र डर बढाएको छ। खेलको दौरान आर्सनलका खेलाडीले गल्ती गर्दा रंगशालामा समर्थकहरूको असन्तुष्टि प्रस्ट देखिन्थ्यो।
आर्सनल ३२ खेलमा ७० अंक का साथ पहिलो स्थानमा छ भने दोस्रो स्थानको म्यानचेस्टर सिटीले ३० खेलमा ६१ अंक जोडेको छ।
अहिले आर्सनल शीर्ष स्थानमै भए पनि म्यानचेस्टर सिटीले आफ्ना बाँकी खेलहरू जितेमा आर्सनललाई सजिलै उछिन्न सक्छ। त्यसैले अर्को हप्ता हुने सिटी र आर्सनलबीचको भिडन्त अब यो सिजनकै सबैभन्दा निर्णायक खेल हुनेछ।
