फिफा विश्वकप २०२६ उद्घाटन शत्रमा सहभागी हुन जान लागेका अखिल नेपाल फुटबल संघ (एन्फा) का अध्यक्ष पंकजबिक्रम नेम्बाङ र महासचिव किरण राईलाई विमानस्थलबाटै फर्काइएको छ।
विश्वकपको उद्घाटनका लागि मेक्सिको जान लागेका दुवैलाई त्रिभुवन अरन्तर्राष्ट्रिय विमानस्थलबाट फर्काइएको अध्यागमन विभागका प्रवक्ता टिकाराम ढकालले सेतोपाटीलाई जानकारी दिए।
ढकालका अनुसार राष्ट्रिय खेलकुद परिषदले रोक्नु भनेकाले आज विहान रोकिएको हो।
यसअघि एन्फाको विषयमा छानविन गर्दा खेलकुद परिषदले एन्फाका अध्यक्ष नेम्बाङसहित २४ जनाको पासपोर्ट कालोसूचीमा राख्न सिफारिस गरेको थियो। एन्फाका पदाधिकारीको पासपोर्ट अझै पनि फुकुवा भएको छैन।
यो बीचमा एन्फा पदाधिकारीले फुकुवा गर्न अनुरोध गरे पनि राष्ट्रिय खेलकुद परिषदले अस्वीकार गरेको थियो।
राष्ट्रिय खेलकुद परिषदले पासपोर्ट कालोसूचीबाट हटाउन अस्वीकार गर्दा पनि एन्फा पदाधिकारी विदेश जान खोजेका थिए। फलस्वरुप उनीहरू एयरपोर्टबाटै फर्कन बाध्य भएका हुन्।
खेलकुद परिषदले एन्फाको विषयमा छानविन गर्नका लागि कार्यकारी सदस्य कमल भट्टराईको संयोजकत्वमा तीन सदस्यीय छानविन उपसमिति गठन गरेको थियो। सोही समितिले आर्थिक विषयमा छानविन गर्न भन्दै नेम्बाङसहितका पदाधिकारीको पासपोर्ट कालोसूचीमा राख्न पत्राचार गरेको थियो।
उक्त पत्र युवा तथा खेलकुद मन्त्रालय हुँदै गृह मन्त्रालय पुगेको थियो। त्यसपछि गृह मन्त्रालयबाट अध्यागमन पत्र पुगेपछि एन्फाका पदाधिकारीहरुको पासपोर्ट कालोसूचीमा राखिएको थियो।
यो बीचमा छानविन समितिले प्रतिवेदन दिएको दिइसकेको छ। तर एन्फा पदाधिकारीको पासपोर्ट भने फुकुवा भएको छैन।
पछिल्लो समय खेलकुद परिषद र एन्फाबीच विवाद छ। आफ्नो निर्देशन विपरित निर्वाचन गर्न लागेको भन्दै एन्फामाथि खेलकुद परिषदले तीन महिनाको निलम्बन गरेको थियो। तर पछि यो निलम्बन परिषदले फुकुवा गरिसकेको छ।
साथै एन्फामा अनिमितता भएको भन्दै अख्तियार दुरुपयोग अनुसन्धान आयोगमा परेका उजुरीको विषयमा खेलकुद मन्त्रालयमा पत्र प्राप्त भएका थिए। त्यसपछि राष्ट्रिय खेलकुद परिषदले छानविनका लागि उपसमिति गठन गरेको थियो। उक्त समितिले नै आर्थिक विषयमा छानविन गर्नु पर्ने भन्दै एन्फा पदाधिकारीको पासपोर्ट कालोसूचीमा राख्दै विदेश जान नदिने भनेको थियो।
त्यतिबेला एन्फाका पदाधिकारी क्यानडाको भ्यानकुवरमा हुने ७६औं फिफा कंग्रेसमा हुने कार्यक्रम थियो। कालोसूचीमा पर्नुका वाबजुद एन्फाका सिइओ इन्द्रमान तुलाधर क्यानडा पुगेका थिए। एन्फा अध्यक्ष लगायतका पदाधिकारी भने त्यतिबेला पनि रोकिएका थिए।
