पोर्चुगलका कप्तान क्रिस्टियानो रोनाल्डोले आफूले राष्ट्रिय फुटबल टोलीको क्याम्प छाड्नु गल्ती भएको स्वीकार गर्दै त्यसको सजाय भोग्न आफू तयार रहेको बताएका छन्। तर उनले अन्तर्राष्ट्रिय फुटबलबाट तत्काल सन्यास लिने कुनै योजना नरहेको पनि स्पष्ट पारेका छन्।
४१ वर्षीय रोनाल्डोले प्रशिक्षक जर्ज जेससले आफूसँग गरेको वाचा दुईपटक तोडेपछि आफूले पोर्चुगलको प्रशिक्षण क्याम्प छाडेको दाबी गरेका छन्।
गत साता नेसन्स लिगअन्तर्गत नर्वेविरुद्धको खेलमा रोनाल्डो बेन्चमै बसेका थिए। त्यसपछि डेनमार्कविरुद्ध पनि आफू सुरुआती टोलीमा नपर्ने थाहा पाएपछि उनले राष्ट्रिय टोलीको क्याम्प छाडेका थिए।
पोर्चुगलका लागि २३४ खेलमा १४६ गोल गरिसकेका रोनाल्डो अन्तर्राष्ट्रिय फुटबलका सर्वाधिक गोलकर्ता र सर्वाधिक खेल खेल्ने खेलाडी हुन्। उनको नेतृत्वमा पोर्चुगलले सन् २०१६ मा युरो कप र दुईपटक नेसन्स लिगको उपाधि जितिसकेको छ।
रोनाल्डोले सामाजिक सञ्जालमा करिब दुई हजार शब्द लामो वक्तव्य जारी गर्दै आफूले गरेको कामको जिम्मेवारी लिन तयार रहेको बताएका छन्। उनले पोर्चुगिज फुटबल महासंघले आफूलाई कारबाही गर्नुपर्ने र त्यसमा कुनै छुट दिन नहुने बताएका छन्।
‘पोर्चुगिज फुटबल महासंघले मेरो कार्यको परिणाम मूल्यांकन गरेर मलाई सजाय दिनुपर्छ। त्यो सजाय कम गरिनु हुँदैन भन्ने मेरो विश्वास छ,’ रोनाल्डोले भनेका छन्।
‘मैले यसअघि नै माफी मागिसकेको छु। तर आफ्ना कामको परिणाम हुन्छ भन्ने मलाई थाहा छ।’
तर रोनाल्डोले आफूले क्याम्प छाड्नुको मुख्य कारण प्रशिक्षक जेसससँगको विश्वास टुट्नु रहेको बताएका छन्।
उनका अनुसार नर्वे र डेनमार्कविरुद्धका खेलमा आफूलाई आराम दिने विषयमा जेसससँग सहमति भएको थियो। तर नर्वेविरुद्धको खेलकै दिन जेससले उनलाई ३० मिनेट खेलाउने बताएका थिए।
रोनाल्डोका अनुसार उनी दोस्रो हाफदेखि वार्मअप गरिरहेका थिए। तर खेलको अन्तिमसम्म पनि उनलाई मैदानमा उतारिएन।
‘सबैलाई थाहा छ त्यसपछि के भयो। मैले दोस्रो हाफदेखि वार्मअप गरेँ, मिनेटहरू बितिरहेको हेरेँ, तर मलाई मैदानमा बोलाइएन। प्रशिक्षकले मसँग गरेको वाचा तोडे,’ रोनाल्डोले भने।
त्यसपछि जेसससँग भएको भेटमा अर्को पत्रकार सम्मेलनमार्फत घटनाबारे स्पष्ट पार्ने सहमति भएको रोनाल्डोको भनाइ छ।
उनका अनुसार त्यसका लागि आठ बुँदे दस्तावेजसमेत तयार गरिएको थियो। जसमा आफूले खेल्ने समय माग नगरेको, प्रशिक्षकको निर्णयको सम्मान गरेको र आफूजस्तो खेलाडीलाई वार्मअप गराएर मैदानमा नउतार्नु प्रशिक्षकको गल्ती भएको उल्लेख थियो।
तर जेससले सार्वजनिक रूपमा दिएको अभिव्यक्ति उनीहरूबीच निजी रूपमा भएको सहमतिभन्दा फरक रहेको रोनाल्डोको आरोप छ।
‘पत्रकार सम्मेलन हामीबीच भएको सहमतिजस्तो थिएन। उनको व्यवहार त्यस्तो थियो, जुन अघिल्लो दिन हामीबीच भएको भेटसँग बिल्कुल मेल खाँदैनथ्यो,’ रोनाल्डोले भने।
उनले जेससको व्यवहारलाई आफूले नपचाएको पनि बताए।
‘मैले यस्तो आक्रामकता र अहंकार देखेँ, जुन मैले पाउनुपर्ने थिएन। निजी भेटमा उनले देखाएको व्यवहारभन्दा त्यो बिल्कुल फरक थियो।’
रोनाल्डोका अनुसार जेससले आफूसँग दोस्रोपटक वाचा तोडेपछि आफूले फेरि कुनै वाचा तोडिने प्रतीक्षा नगरी क्याम्प छाड्ने निर्णय गरेका थिए।
यद्यपि, राष्ट्रिय टोलीको क्याम्प छाड्नु आफ्नो गल्ती भएको उनले स्वीकार गरेका छन्।
‘मैले क्याम्प छाड्नु हुँदैनथ्यो। यसको जिम्मेवारी पूर्ण रूपमा मेरो हो,’ रोनाल्डोले भने।
उनले आफ्ना सहकर्मी खेलाडी र पोर्चुगलका समर्थकसँग पनि माफी मागेका छन्।
‘मैले राष्ट्रिय टोलीका साथीहरूलाई क्याम्प छाडेकोमा माफी मागेको छु। पोर्चुगलका जनतासँग पनि फेरि माफी माग्छु। तर कसैले गरेको वाचा तोडिनु मेरो लागि निकै गम्भीर विषय हो।’
यसअघि रोनाल्डोले यसै वर्षको विश्वकपपछि अन्तर्राष्ट्रिय फुटबलबाट सन्यास लिनेबारे सोच बनाएका थिए। उनले समर्थकलाई विदाइका क्रममा भन्न चाहेका कुराहरू समेटेर पत्रसमेत तयार पारेका थिए। तर अमेरिकाबाट फर्किने क्रममा पोर्चुगिज फुटबल महासंघका अध्यक्ष पेड्रो प्रोएन्साले उनलाई आफ्नो निर्णयमा पुनर्विचार गर्न आग्रह गरेका थिए।
अब भने रोनाल्डोले आफू राष्ट्रिय टोलीका लागि उपलब्ध रहने स्पष्ट पारेका छन्।
‘म शारीरिक रूपमा फिट रहेँ, आफ्नो क्लबका लागि खेलिरहेको रहेँ र आशा गरेअनुसार गोल गरिरहेको रहेँ भने म अन्तर्राष्ट्रिय फुटबल खेलिरहन चाहन्छु,’ उनले भने।
‘मेरो निलम्बनको अवधि सकिएपछि म सधैंझैँ राष्ट्रिय टोलीका लागि खेल्न र जित्न उपलब्ध हुनेछु।’
रोनाल्डोको यो भनाइसँगै पोर्चुगलको राष्ट्रिय टोलीमा उनको भविष्य तत्कालका लागि स्पष्ट भएको छ। प्रशिक्षक जर्ज जेसससँगको सम्बन्धमा भने तनाव कायमै देखिएको छ।
रोनाल्डो अहिले साउदी क्लब अल नासरसँग प्रशिक्षणमा फर्किएका छन्। उनले पोर्चुगल, स्पोर्टिङ, म्यानचेस्टर युनाइटेड, रियल मड्रिड, युभेन्टस र अल नासरका लागि खेल्दै कुल ९७९ गोल गरेका छन्। उनी करिअरको १ हजार गोल पूरा गर्ने लक्ष्यको नजिक छन्।
रोनाल्डोबिनै खेलेको नर्वे र डेनमार्कविरुद्ध पोर्चुगलले जित निकालेको छ। पोर्चुगलले अब नोभेम्बरमा डेनमार्क र वेल्ससँग नेसन्स लिगका अन्तिम समूह खेल खेल्नेछ।
.JPG)
