नेपाल प्रिमियर लिग (एनपिएल) मा सुदूरपश्चिम रोयल्सविरुद्ध जित निकालेपछि विराटनगर किंग्सका कप्तान सन्दीप लामिछानेले जस्तोसुकै परिस्थितिमा पनि मैदानमै खेलेर नतिजा निकाल्नुपर्ने बताएका छन्।
शनिबार राति वर्षाले प्रभावित खेलमा विराटनगरले सुदूरपश्चिमलाई ३५ रनले पराजित गरेको थियो। पाँच ओभरमा सीमित खेलमा विराटनगरले दुई विकेट गुमाएर १०५ रन बनाएको थियो। जवाफमा सुदूरपश्चिमले तीन विकेट गुमाएर ७० रन मात्रै बनाउन सक्यो।
जितपछि प्रतिक्रिया दिँदै सन्दीपले खेलको स्वरूप जस्तोसुकै भए पनि मैदानमा उत्रिएर नतिजा निकाल्नु नै आफ्नो टोलीको सोच रहेको बताए। ‘चाहे पाँच, सात, १५ वा २० ओभरको खेल होस्, हामीले मैदानमै खेलेर नतिजा निकाल्नुपर्छ,’ उनले भने।
विराटनगरसँग १० नम्बरसम्म ब्याटिङ गर्न सक्ने खेलाडी रहेकाले परिस्थितिअनुसार १०० भन्दा बढी रन बनाउने लक्ष्य राखिएको सन्दीपले खुलाए। टस हार्नु दुर्भाग्यपूर्ण भए पनि खेलाडीले मैदानमा उत्कृष्ट मेहनत र चरित्र प्रदर्शन गरेको उनको भनाइ थियो। स्वदेशी तथा विदेशी सबै खेलाडी खेल्नका लागि तयार रहेको पनि उनले बताए।
‘म कर्मामा विश्वास गर्छु। भाग्यमा जे लेखिएको छ, त्यो भएरै छाड्छ,’ उनले भने।
सन्दीपले क्रिकेट खेल्न मैदानमा आएको अवस्थामा टस वा मैदानको अवस्थालाई लिएर विवाद गर्नुभन्दा खेलमार्फत नतिजा निकाल्नुपर्ने धारणा राखे। प्रतिकूल मौसमका बाबजुद टोलीलाई समर्थन गर्न आउने दर्शक र मैदान तयार पार्न खटिने ग्राउन्ड स्टाफको मेहनतको सम्मान गर्न पनि खेल्नु आफ्नो दायित्व भएको उनले बताए।
‘मैले आफ्नो नियन्त्रणमा भएका कुराहरू मात्रै नियन्त्रण गर्न सक्छु। अरूले के भन्छन् वा बाहिरी परिस्थितिलाई म नियन्त्रण गर्न सक्दिनँ,’ सन्दीपले भने।
उनले टोलीको ड्रेसिङ रुममा जित वा हार दुवै अवस्थामा सकारात्मक वातावरण रहने बताए। टोलीका मालिक पारस लुनिया स्वयं नेपालको प्रतिनिधित्व गरिसकेका क्रिकेटर भएकाले खेलाडीको भावना बुझ्ने र सधैँ प्रोत्साहन गर्ने गरेको पनि उनले उल्लेख गरे।
कप्तान र खेलाडीका रूपमा मैदानमा गएर आफ्नो जिम्मेवारी पूरा गर्नु नै पहिलो कर्तव्य रहेको सन्दीपको भनाइ थियो।
व्यक्तिगत प्रदर्शनभन्दा टोलीको जित महत्त्वपूर्ण हुनेमा पनि उनले जोड दिए। आफू वा अन्य कुनै खेलाडीले व्यक्तिगत रूपमा उत्कृष्ट प्रदर्शन गरे पनि टोली विजयी हुन नसके त्यसले खुसी दिन नसक्ने उनले बताए।
‘मैले वा कसैले व्यक्तिगत रूपमा जति राम्रो प्रदर्शन गरे पनि टोलीले जित्न सकेन भने खुसी मिल्दैन। सबैभन्दा महत्त्वपूर्ण कुरा टोली विजयी पक्षमा रहनु हो,’ उनले भने।
वर्षाका कारण शनिबारको खेल निर्धारित समयभन्दा ढिलो सुरु भएको थियो। त्रिवि मैदानको आउटफिल्डमा पानी जमेपछि खेल हुने नहुने अन्योल थियो। लामो छलफल र ग्राउन्ड स्टाफको मेहनतपछि राति ९:२० बजे पाँच ओभरको खेल सुरु भएको थियो। विराटनगरले यही खेल जित्दै प्रतियोगितामा पहिलो जित दर्ता गरेको हो।
