नेपाल प्रिमियर लिग (एनपिएल) अन्तर्गत काठमाडौं गोर्खाजविरुद्ध कर्णाली याक्सले विशाल योगफल बनाएको छ। कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको कर्णालीले निर्धारित २० ओभरमा ६ विकेट गुमाएर १८० रन बनाएको छ।
कर्णालीका लागि अरिफुल इस्लाम र हुसैन तलातले उत्कृष्ट ब्याटिङ गरे। अरिफुलले २२ बलमा ५ चौका र ३ छक्काको मद्दतले ४४ रन बनाए। उनले २०० को स्ट्राइक रेटमा ब्याटिङ गरेका थिए।
त्यस्तै, हुसैन तलातले ३० बलमा ४० रन जोडे। उनले १ चौका र २ छक्का प्रहार गरे। अरिफुल र तलातको आक्रामक ब्याटिङले कर्णालीलाई बलियो योगफलतर्फ अघि बढाएको थियो।
कर्णालीले सुरुवात भने राम्रो गरेको थियो। पहिलो विकेटका लागि जिशान आलम र अरिफुलले २० रनको साझेदारी गरे। जिशान ७ रन बनाएर आउट भए। त्यसपछि अरिफुलले मार्क वाटसँग दोस्रो विकेटका लागि ४६ रनको साझेदारी गरे। अरिफुल छैटौं ओभरमा आउट हुँदा कर्णालीको स्कोर ६६ रन पुगेको थियो।
त्यसपछि कर्णालीले दीपक डुम्रे र मार्क वाटको विकेट गुमाउँदा ७८ रनमा ४ विकेटको अवस्थामा पुगेको थियो। दीपकले ८ तथा वाटले १७ रन बनाए।
तर पाँचौं विकेटका लागि पवन सर्राफ र हुसैन तलातले महत्वपूर्ण ६५ रनको साझेदारी गरे। उनीहरूले ३५ बलमा उक्त रन जोडे। यही साझेदारीले कर्णालीलाई पुनः खेलमा बलियो अवस्थामा पुर्यायो।
तलात ४० रन बनाएर १७औँ ओभरमा आउट भए। त्यसपछि गुल्सन झाले आक्रामक ब्याटिङ गर्दै १२ बलमा २० रन जोडे। उनले २ छक्का प्रहार गरे। गुल्सन छैटौँ विकेटका रूपमा आउट भए।
पवन सर्राफ २४ बलमा ३० रन बनाएर अविजित रहे। उनले २ छक्का प्रहार गरे। कप्तान सोमपाल कामी १ रनमा नटआउट रहे।
काठमाडौंका लागि करण केसीले सर्वाधिक २ विकेट लिए। उनले ४ ओभरमा ३५ रन खर्चिए। शाहब आलम, जहानदाद खान, देव शाह र सन्तोष यादवले समान १ विकेट लिए। सन्तोषले २ ओभरमा ८ रन मात्रै खर्चिएर किफायती बलिङ गरे।
