नेपाल प्रिमियर लिग (एनपिएल) मा काठमाडौं गोर्खाजले कर्णाली याक्सलाई ४ विकेटले पराजित गरेको छ। कीर्तिपुरस्थित त्रिवि क्रिकेट मैदानमा सोमबार भएको खेलमा काठमाडौंले कर्णालीले दिएको १८१ रनको लक्ष्य १९.४ ओभरमा ६ विकेट गुमाएर पूरा गर्यो।
काठमाडौंको जितमा रशिद खान र कप्तान करण केसीले उत्कृष्ट ब्याटिङ गरे। रशिदले अर्धशतकीय इनिङ्स खेल्दा करणले आक्रामक ब्याटिङ गर्दै टोलीलाई जितसम्म पुर्याउने आधार तयार गरे।
लक्ष्य पछ्याउने क्रममा काठमाडौंले अस्ट्रेलियन स्टार ओपनर डेभिड वार्नरलाई सस्तैमा गुमाएको थियो। उनलाई कर्णालीका कप्तान सोमपाल कामीले दोस्रो ओभरमै बोल्ड गरे। वार्नरले १० बलमा ३ चौकासहित १६ रन बनाए। सोमपालले वार्नरलाई आउट गर्दै काठमाडौंलाई सुरुमै दबाबमा पारेका थिए।
त्यसपछि स्मित पटेल पनि ९ रन बनाएर आउट भए। ४.१ ओभरमा २८ रन हुँदा दुई विकेट गुमाएको काठमाडौंलाई तेस्रो विकेटका लागि मोहम्मद आदिल आलम र रशिद खानले सम्हाले।
यी दुईले ३८ बलमा ५४ रनको साझेदारी गरे। आदिल २७ बलमा २० रन बनाएर १२औँ ओभरमा आउट भए। त्यसपछि आएका भीम सार्की पनि धेरै समय टिक्न सकेनन्। उनले ४ बलमा ५ रन बनाए।
८९ रनमा चार विकेट गुमाएको काठमाडौंलाई जितको बाटोमा फर्काउने काम रशिद र करणले गरे। पाँचौँ विकेटका लागि यी दुईले २४ बलमा ५५ रनको महत्वपूर्ण साझेदारी गरे।
रशिदले ३३ बलमा ३ चौका र २ छक्काको मद्दतले ५० रन बनाए। उनी १७औँ ओभरमा आउट भए। रशिदको अर्धशतकीय इनिङ्स काठमाडौंको जितको मुख्य आधार बन्यो।
त्यसपछि कप्तान करण केसीले आक्रामक ब्याटिङ गरे। उनले २० बलमा ४ चौका र ३ छक्कासहित ४४ रन बनाए। करणले २२० को स्ट्राइक रेटमा ब्याटिङ गरेका थिए। उनी १८औँ ओभरमा आउट हुँदा काठमाडौंलाई जितका लागि अझै २१ रन आवश्यक थियो।
तर जहानदाद खानले आक्रामक ब्याटिङलाई निरन्तरता दिए। उनले १० बलमा १ चौका र २ छक्कासहित अविजित २२ रन बनाए। सन्तोष यादव ३ बलमा ५ रन बनाएर नटआउट रहे। उनीहरूले टोलीलाई १९.४ ओभरमा लक्ष्यसम्म पुर्याए।
कर्णालीका लागि हुसैन तलातले २ तथा सोमपाल कामी, नन्दन यादव, मार्क वाट र युनिस सिंह ठकुरीले समान १ विकेट लिए।
यसअघि टस हारेर पहिले ब्याटिङ गरेको कर्णालीले निर्धारित २० ओभरमा ६ विकेट गुमाएर १८० रन बनाएको थियो।
कर्णालीका लागि अरिफुल इस्लामले सर्वाधिक ४४ रन बनाए। उनले २२ बलमा ५ चौका र ३ छक्का प्रहार गरे। हुसैन तलातले ३० बलमा ४० रन जोडे। यी दुईले दोस्रो विकेटका लागि ४६ रनको साझेदारी गरेका थिए।
कर्णालीले ७८ रनमा चार विकेट गुमाएपछि दबाबमा परेको थियो। तर पवन सर्राफ र हुसैन तलातले पाँचौँ विकेटका लागि ३५ बलमा ६५ रनको साझेदारी गर्दै इनिङ्स उकासे। तलात ४० रन बनाएर आउट भए।
पवनले २४ बलमा ३० रन बनाउँदै अविजित रहे। गुल्सन झाले १२ बलमा २० रन जोडे। अन्तिमतिर सोमपाल कामी १ रनमा अविजित रहे।
काठमाडौंका लागि करण केसीले २ विकेट लिए। शाहब आलम, जहानदाद खान, देव शाह र सन्तोष यादवले समान १ विकेट हात पारे। सन्तोषले २ ओभरमा ८ रन मात्रै खर्चिए।
यस जितसँगै काठमाडौंले कर्णालीको लगातार जितको यात्रामा पूर्णविराम लगाएको छ। यो काठमाडौंको पहिलो जित हो।
