साइकल कल्चर कम्युनिटीले धुलिखेल अस्पतालसँगको सहकार्यसहित विभिन्न संघसंस्था तथा व्यक्तिसँगको समन्वय र सहयोगमा आयोजित साइकल यात्राको अन्तिम तयारी पूरा भएको छ।
१८ सय किलोमिटर लामो मध्यपहाडी लोकमार्ग साइकल यात्रामा सहभागी साइक्लिस्ट झापा इलाम हुँदै पाँचथरको चिवाभञ्याङ पुगेर सन् २०२६ जनवरी १ गते विहानबाट यस ऐतिहासिक साइकल यात्राको उदघाटन हुनेछ ।
एक महिना अघि धुलिखेल अस्पतालमा यस कार्यक्रमको औपचारिक जानकारी सार्वजनिक गरेको थियो । यस साइकल यात्राको प्रमुख उद्देश्य क्यान्सर विजेताहरुको अगुवाइमा मध्यपहाडी लोक मार्गमा साइक्लिंग गरि क्यान्सर विमारी उपचार कोष निर्माण गर्नु भएको आयोजकको भनाइ छ।
कोष निर्माणको उद्देश्य गरिबीको रेखा मुनि रहेका असाहाय क्यान्सर विमारीहरुको उपचारमा सहयोग पुर्याइने भएको छ।
सामाजिक संस्था साइकल कल्बर कम्युनिटीले राइड फर लाइफ कार्यक्रम अन्तर्गत वार्षिक रुपमा सहायता कोष निर्माण हेतुले यस्ता विविध किसिमका कार्यक्रम सञ्चालन गर्ने लक्ष्य लिएको छ। सोही उद्देश्य अनुरुप यस वर्ष क्यान्सर विमारी सहायता कोषका लागि ऐतिहासिक साइकल यात्राको थालनी गरिएको हो। कोष निर्माणमा संस्थाका सबै सदस्यले आर्थिक योगदानका साथै अन्य साइकलप्रेमी समुदायलाई पनि समेटेर भोलेन्टियर कार्य गर्दै आएको छ ।
पाँचथर चिवाभञ्याङबाट सुरु भई बैतडी झुलाघाट पुगेर अन्त्य गरिने यस साइकल यात्राको नेतृत्व क्यान्सरसँग सङ्घर्षरत साइक्लिस्ट हर्क लामाले गर्ने छन् । सन् २०२० मा उनको पिसाव थैलीमा क्यान्सर देखिएपछि धुलिखेल अस्पतालमा उपचार गरिएको थियो।
स्तन क्यान्सरको तेस्रो चरणबाट उठेर साइकलमार्फत सक्रिय सकारात्मक जीवनशैली अपनाई आएकी कविता चित्रकार हर्क लामासँगै उक्त साइकल यात्रामा सहभागी हुने छिन् । उनले संसारकै उच्चतम हिमालमा आयोजना गरिने अन्तर्राष्ट्रिय साइकल प्रतियोगिता याक एट्याक २०२५ मा सहभागी भइ अन्पूर्ण सर्किट थोरोड्ला पास यात्रा सम्पन्न गरेकी थिइन्।
कूल १८०० किमी दुरी पार गर्ने यस साइकल यात्रामा ५२ सय मिटरसम्ममा पुगिनेछ। त्यस क्रममा मेचीदेखि महाकालीका साइकलप्रेमी तथा सहयोगीहरु यात्रामा जोडिने छन्। एक महिनासम्म जारी रहने यस साइकल यात्रामा विभिन्न सचेतनामूलक कार्यक्रमहरुको आयोजना गरिने छ । कतिपय स्थानमा स्वास्थ्य जाँच कार्यक्रम पनि सञ्चालन गरिने छ । स्थानीय संघसंस्थाले आफ्नो क्षेत्रमा विविध कार्यक्रमको आयोजनासहित यस यात्रालाई सहयोग गर्न सक्ने छन् । जो कोहि व्यक्ति सहभागी भई यस यात्रालाई उत्सवमयी बनाउन र आफ्नो गध्य अनुसार कोषमा मुष्ठीदान गर्न सक्ने छन् । यात्रा थालनी गर्नु अगावै आन्तरिक तथा अन्तर्राष्ट्रिय स्तरबाट करिब २० लाख रुपैयाँ सहयोग प्राप्त भइसकेको छ ।
व्यवस्थापकीय खर्च कटाएर यस साइकल यात्राबाट प्राप्त रकम क्यान्सर विमारी सहयोग कोष स्थापनाका लागि धुलिखेल अस्पताललाई हस्तान्तरण गरिने छ । व्यवस्थापकीय खर्च कटौती गर्न टेन्टमा बस्ने, आफ्नो खर्चको व्यवस्थापन आफै गर्ने, विभिन्न संघसंस्थाहरुबाट जिन्सी सहयोग लिने लगायतका उपाय अपनाइएको छ।
-1756794700.JPG)
-1746009348.jpg)
