इंग्लिस प्रिमियर लिगअन्तर्गत शनिबार भएका सुरुवाती दुई खेलमा ७-७ गोल भएका छन्।
७ गोल भएको पहिलो खेलमा एभर्टनले वेस्ट ब्रुममाथि ५-२ को जित निकाल्यो। एभर्टनको जितमा कल्भर्ट लेविनले ह्याट्रिक गरे। उनले खेलको ३१, ६२ र ६६ मिनेटमा गोल गरेर ह्याट्रिक पूरा गरेका थिए।
एभर्टनका लागि थप गोल रोद्रिगेजले ४५ मिनेट र माइकल केइनले ५४ मिनेटमा गरे।
त्यसअघि खेलमा अग्रता वेस्ट ब्रुमले दशौं मिनेटमा डिएगानाले गरेको गोलबाट लियो।
पहिलो हाफको इन्जुरी टाइममा वेस्ट ब्रुमका गिब्सले रातो कार्ड पाउँदा दोस्रो हाफ पूरै १० खेलाडीमा खेल्नु पर्यो। यद्यपी वेस्ट ब्रुमका कोस्टा पिरेइराले ४७ मिनेटमा गोल बराबरी गोल फर्काएका थिए। तर त्यसपछि एभर्टनले तीन गोल थप्यो।
एभर्टनको यो लगातार दोस्रो जित हो। दोस्रो जितसँगै एभर्टन लिगको शीर्ष स्थानमा उक्लिएको छ।
यता लिड्स र फुलहमबीचको खेलमा पनि ७ गोल भएको छ। खेलमा लिड्सले ४-३ गोलको जित हात पारेको छ।
लिड्सका लागि हेल्डर कोस्टाले ५ र ५७ मिनेटमा गरी दुई गोल गरे। क्लिचले ४१ मिनेटमा पेनाल्टीबाट गोल गरेका थिए भने बामफोर्डले ५० मिनेटमा अर्को गोल गरे।
फुलहमका लागि मित्रोभिकले ३४ मिनेटमा पेनाल्टी तथा ६७ मिनेटमा गरी दुई गोल गरे। यस्तै ६२ मिनेटमा डे कोर्डोभाले फुटहलमका लागि गोल गरेका थिए।
फुलहम र वेस्ट ब्रुम दुवै सुरुवाती दुई खेलमा पराजित भइसकेका छन्।