यसवर्षको हिट फिल्म 'घरज्वाइँ' का निर्माताले नयाँ फिल्म घोषणा गरेका छन्।
बसन्त पञ्चमी अर्थात सरस्वति पूजाको अवसर पारेर जनक घर्ती मगरको लगानी र अनिल बुढा मगरको निर्देशन रहने फिल्म 'मितज्यू' घोषणा गरिएको हो।
सोमबार सार्वजनिक फिल्मको पेन्टिङ थिम पोस्टरमा दुई पात्रलाई एक सामान बोकन भ्यान अगाडि हातको पञ्जा जुधाई रहेको अवस्थामा प्रस्तुत गरिएको छ। भ्यानको माथी खसी र खसीको टाउकोमा कुखुराको भालेलाई देख्न सकिन्छ। फिल्मको सार्वजनिक थिम पोस्टरबाट 'मितज्यू' को कथावस्तु बारेमा जानकारी दिइएको छ।
यो वर्ष रिलिज भएको 'घरज्वाइँ' बक्सअफिसमा हिट भएपछि सोही टिमले निर्माण गर्न लागेको फिल्म वर्ष २०८२ को चैत २७ गतेदेखि प्रदर्शनमा आउने जानकारी दिइएको छ। यो वर्ष ५१ औं दिन मनाउने फिल्म सूचीमा 'घरज्वाइँ' पर्छ। जुन फिल्मले दर्शक तथा समीक्षकबाट राम्रो प्रतिक्रिया पाएको थियो। फिल्मलाई नेपालमा आरआर फिल्म्सले वितरण गर्नेछ।
जिएम मूभिज प्रोडक्सन र एबीएम सिने प्रोडक्सनको ब्यानरमा फिल्म निर्माण हुनेछ। अर्को वर्षको छायांकन हुने फिल्ममा को-को कलाकार रहने भन्ने निर्माण टिमले सार्वजनिक गरेको छैनन्। केही दिनपछि फिल्मको कास्ट एण्ड क्रिउको बारेमा जानकारी दिँदै जाने निर्माता जनक घर्ती मगर बताउँछन्।
महेश राईको लेखन रहेको फिल्मका प्रोडक्सन कन्ट्रोलर धन बहादुर राई हुन्। नोभिस आट्र्सले डिजाइन गरेको पोस्टरको पेन्टिङ पुष्प आले मगरले गरेका हुन्।
