काठमाडौं महानगरपालिकाको आयोजनामा तीनदिने 'काठमाडौं फिल्म फेस्टिभल २०८३' आजदेखि सुरू हुँदै छ।
१५ गते आइतबारसम्म सञ्चालन हुने फेस्टिभलमा स्वदेशी तथा विदेशी फिल्मकर्मी, कलाकार, निर्देशक र फिल्म क्षेत्रका विज्ञहरूको सहभागिता रहनेछ।
काठमाडौंको मौलिक कला, संस्कृति, परम्परा तथा सम्पदाको प्रवद्र्धन गर्ने उद्देश्यले आयोजित फेस्टिभलमा भारतीय अभिनेत्री शबाना आजमी, सांघाई फिल्म एकेडेमीका विशिष्ट प्राध्यापक मार्को मुलर, जापानी फिल्म निर्देशक ताकायुकी नाकामुरा, भारतीय फिल्म प्रोग्रामर दीप्ति डीकुन्हालगायत सहभागी हुनेछन्।
फेस्टिभलमा फिल्म प्रदर्शनसँगै अन्तरसंवाद, मास्टर क्लास, रेड कार्पेट र पुरस्कार वितरणलगायत कार्यक्रम हुने महानगरपालिकाका प्रवक्ता नवीन मानन्धरले जानकारी दिए।
महोत्सवको पहिलो दिन आज वसन्तपुरमा सम्पदा यात्रा र उद्घाटन समारोह हुनेछ। बेलुका ५:३० बजे कार्यक्रम सुरू हुने तय छ।
दोस्रो दिन शनिबार नेपाल पर्यटन बोर्डमा अभिनेत्री शबाना आजमी 'फिल्म्स्, फेस्टिभल्स एण्ड अ लाइफ वेल लाइभ्ड' विषयक अन्तरसंवादमा सहभागी हुनेछिन्।
दीप्ति डीकुन्हा ‘सिर्जनात्मक सहरहरूको प्रवद्र्धनका लागि फिल्म र महोत्सव’ विषयक छलफलमा सहभागी हुनेछिन्।
सोही दिन जापानी निर्देशक नाकामुराले राष्ट्रिय सभागृहमा यामागाता युनेस्को फिल्म सिटीका लघु फिल्मबारे प्रस्तुति दिनेछन्।
आइतबार पर्यटन बोर्डमा मार्को मुलरले चलचित्र सौन्दर्यशास्त्रसम्बन्धी मास्टर क्लास सञ्चालन गर्नेछन्। त्यसै दिन 'नेपाली चलचित्र उद्योगको विगत, वर्तमान र भविष्य' विषयमा प्यानल छलफल समेत हुनेछ।
अन्तिम दिन राष्ट्रिय सभागृहमा रेड कार्पेट, पुरानो नेपाली फिल्म ‘के घर के डेरा’को विशेष प्रदर्शन तथा पुरस्कार वितरण समारोह आयोजना गरिनेछ।
फेस्टिभलमा नेपाली फिल्म 'के घर के डेरा'सँगै 'कुमारी' को विशेष प्रदर्शन गरिनेछ। त्यस्तै, 'इन्टरनेसनल पानोेरामा' अन्तर्गत चिनियाँ फिल्म 'डियर यु', भारतीय फिल्म 'बयान', कोरियाली फिल्म 'द किङ्स वार्डेन', अमेरिकी फिल्म 'द गडफादर' लगायत विभिन्न देशका फिल्म जय नेपाल सिनेमा हलमा प्रदर्शन हुनेछन्।
स्थानीय प्रतिभालाई प्रोत्साहन गर्न 'नेपाल पानोरामा सर्टस्' र 'माई कल्चर, माई हेरिटेज' शीर्षकमा युवा भिडिओ च्यालेन्जसमेत आयोजना गरिएको छ।
नेपाल पानोरामा सर्टस्का लागि प्राप्त ७५ फिल्ममध्ये १० वटा छनोट भएका छन्। छनोट भएका प्रत्येक फिल्मलाई एक लाख रूपैयाँ प्रोत्साहन पुरस्कार प्रदान गरिनेछ। त्यस्तै, युवा भिडिओ च्यालेन्जमा प्राप्त ३५ भिडिओमध्ये ११ वटा छनोट भएका छन्। उत्कृष्ट तीन भिडिओले क्रमशः एक लाख ५० हजार, एक लाख र ५० हजार पैयाँ पुरस्कार पाउनेछन्।
फेस्टिभलमा दर्शकले फिल्म निःशुल्क हेर्न पाउनेछन्। यद्यपि सिट सुरक्षित गर्न निःशुल्क टिकट लिनुपर्नेछ।
काठमाडौंको मौलिक पहिचानलाई विश्वमाझ पुर्याउने, स्थानीय कलाकारलाई अन्तर्राष्ट्रिय मञ्चसँग जोड्ने तथा फिल्म उद्योग र पर्यटन प्रवद्र्धन गर्ने उद्देश्यले महोत्सव आयोजना गरिएको महानगरपालिकाले जनाएको छ।
