एस एण्ड एस प्रोडक्सनको ब्यानरमा निर्मित फिल्म 'किन लाग्छ माया' को फर्स्टलुक पोस्टर सार्वजनिक गरिएको छ।
निर्माण पक्षले फिल्मको फस्टलुक सार्वजनिक गर्दै प्रदर्शन मिति तय गरेको छ। फिल्म आगामी चैत ६ गतेदेखि प्रदर्शन हुने भएको हो।
सार्वजनिक फस्टलुक पोस्टरमा फिल्मका मुख्य कलाकारहरू सन्जीत भण्डारी, जाहन्वी बस्नेत, सेडो रियल र ऋचा थापालाई देख्न सकिन्छ। म्युजिक भिडियोमा निरन्तर सक्रिय कलाकार सेडो रियलले यसै फिल्ममार्फत रजतपटमा 'डेब्यु' गर्दैछन्।
सन्जीत भण्डारी र मोनु खड्काको निर्माण रहेको ‘किन लाग्छ माया’ कुवेर तामाङको निर्देशनमा बनेको हो।
फिल्ममा सन्जीत, जाहन्वी, ऋचा र सेडोका साथमा धिरन शाक्य, ‘मिस पबी’ (पवित्रा साँकी), हिउँबाला गौतम, सबिन बास्तोला, रवि डंगोल, गोपाल ढकाल ‘छन्दे’, राजेन्द्र खड्गीलगायतका कलाकारहरूको अभिनय छ।
त्यस्तै, बाल कलाकारका रूपमा आराध्या राज्यलक्ष्मी बिसी, विनायक सुनुवार र सुरित पुडासैनीले अभिनय गरेका छन्।
फिल्मको कथा सेडो रियलकै अवधारणामा आधारित छ भने पटकथा र संवाद रामकाजी घिमिरेले तयार पारेका हुन्। फिल्ममा राजेन्द्र खड्गीको द्वन्द्व निर्देशन, रामशरण उप्रेतीको छायांकन तथा टेकेन्द्र शाहको सम्पादन रहेको छ।
यसमा पुष्कर सुनुवार र राजेन्द्र बजगाईंको संगीत तथा रामजी लामिछाने, नितिन वाइबा र अभि वाग्लेको कोरियोग्राफी छ। फिल्मको पोस्टर राकेश दाहालले तयार पारेका हुन्।
पारिवारिक तथा सामाजिक कथावस्तुमा निर्माण भएको यस फिल्मले दाजुभाइबीचको मित्रता, एक-अर्काप्रतिको जिम्मेवारी, त्याग र विवाहपछि श्रीमान्-श्रीमतीबीच विकसित हुने प्रेम सम्बन्धको कथा प्रस्तुत गर्ने निर्माण पक्षले जनाएको छ।
-1746009348.jpg)
