फिल्म 'मितज्यू' को फर्स्टलुक पोस्टर सार्वजनिक भएको छ। निर्माण पक्षले शुक्रबार सार्वजनिक गरेको फर्स्टलुकमा फिल्मका मुख्य तीन कलाकार दयाहाङ राई, सौगात मल्ल र तेरिया फौजा मगरलाई देख्न सकिन्छ।
सार्वजनिक पोस्टरले गहिरो सम्बन्ध, प्रतिस्पर्धा र भावनात्मक द्वन्द्वको संकेत गर्छ। पोस्टरमा दयाहाङ राई र सौगात मल्ल गाडीको अगाडि हात मिलाएर शक्ति प्रदर्शन गरिरहेको दृश्य देखिन्छ। उनीहरूको हाउभाउले मित्रता र प्रतिस्पर्धा सँगसँगै अघि बढ्ने कथाको संकेत दिन्छ। बीचमा गाडीको बोनटमाथि बसेकी तेरिया मगरको स्थिर र आत्मविश्वासी अभिव्यक्तिले कथा त्रिकोणात्मक सम्बन्धतर्फ मोडिन सक्ने अनुमान गर्न सकिन्छ। उनी दुवै पात्रबीचको भावनात्मक केन्द्रबिन्दु जस्तो देखिन्छिन्।
पृष्ठभूमिमा देखिएको ग्रामीण-पहाडी परिवेश, गाडीको छतमा राखिएका सामानले गाउँघरको परिवेश, संघर्ष र यथार्थपरक कथा फिल्ममा प्रस्तुत हुने संकेत दिन्छ। यसले सामाजिक सम्बन्ध, मित्रता र त्यसबाट उत्पन्न द्वन्द्व कथाको मूल आधार हुन सक्ने आभास दिन्छ।
अनिल बुढा मगरको निर्देशनमा बनेको ‘मितज्यू’ मा दयाहाङ, सौगात र तेरियाका साथमा पुश्कर गुरूङ, शिशिर वाङ्देल, राज थापा, सुवर्ण थापा, अनु थापा, स्मिता लामिछाने, अरूण पुन मगर, उत्तम राज पाण्डे, सविन कट्टेल, उमेश सोनाम, पवित्रा खड्का, चाहाना राना मगर, अनुशा राई, खड्गबहादुर पुन मगर (खबपु) लगायत कलाकारहरूको अभिनय छ।
तेरिया मगरको यो अभिनेत्रीका रूपमा डेब्यु फिल्म हो भने यस फिल्मको निर्माता जनक घर्ती मगर हुन्।
जीएम मुभिज प्रोडक्सनको ब्यानरमा फिल्म बनेको हो। 'मितज्यू' आगामी जेठ १५ गते गणतन्त्र दिवसको अवसर पारेर प्रदर्शनमा आउने तय छ। यसको वितरण आरआर फिल्म्सले गर्नेछ।
-1746009348.jpg)
