राजेन्द्र बस्नेत निर्देशित फिल्म 'कार्की साइँला' को छायांकन सकिएको छ। फ्लोरमा निस्किएको २१ दिनमा फिल्मको छायांकन सकिएको हो।
निर्देशक बस्नेतका अनुसार धनकुटाबाट सुरू गरिएको छायांकन सुनसरीको चतहरा र बराहक्षेत्र आसपासमा गरिएको छ।
एक महिनाको छायांकन सेड्युल तय गरिए पनि कलाकार तथा प्राविधिकहरूको अथक मेहनतका कारण निर्धारित समयभन्दा अगावै छायांकन सकिएको निर्देशक बस्नेतले बताए।
फिल्ममा जितु नेपाल, प्रियना आचार्य (मुन्नी), सुशील पोखरेल, विरेन्द्र सिंह कुशहुवा, मान्शी शर्मा, मनिल तामाङ, रेणुका आचार्य, दिप्सन लिम्बु, रोदा राई, कमल देवकोटालगायत कलाकारहरूको अभिनय छ।
फिल्ममा अभिनेता जितुको जोडीको रूपमा प्रियना आचार्य छिन्। उनीहरूको यो पहिलो सहकार्य हो। यसअघि प्रियनाले 'लाज शरणम्' र 'झरिपछिको इन्द्रेणी' मा अभिनय गरेकी थिइन्।
बालकुमार राई निर्माता रहेको 'कार्की साइँला' मा कृष्ण भगत चाम्लिङ प्रस्तुतकर्ता छन्। डम्बर राईले फिल्म खिचेका हुन्।
फिल्मको प्रदर्शन मिति भने निर्माण टिमले घोषणा गरेको छैन।
-1746009348.jpg)
