फिल्म 'टिकाः स्टेटलेस सोल' को छायांकन प्रारम्भ भएको छ।
कास्की जिल्लाको पामेबाट आइतबारदेखि यो फिल्मको छायांकन सुरू गरिएको हो।
४० दिनको छायांकन तालिकासहित फ्लोरमा गएको यो फिल्मको ३० दिनको छायांकन गण्डकी प्रदेशको कास्की जिल्लामै हुनेछ भने बाँकी दृश्य काठमाडौंलगायत अन्य स्थानमा खिचिनेछ।
फिल्मका कार्यकारी निर्माता तेजबिक्रम केसीका अनुसार कास्कीको पोखरा तथा त्यस आसपासका पामे, सराङकोट, निरभानेलगायतका स्थानमा छायांकन गरिनेछ। कास्कीका आकर्षक लोकेसनहरूले फिल्मको कथालाई जीवन्त बनाउन महत्वपूर्ण भूमिका खेल्ने विश्वास उनले व्यक्त गरे।
भविष्य फिल्मस् प्रालि र थर्ड आई आट्र्सको ब्यानरमा निर्माण हुने फिल्मको निर्माता भविष्य खड्का हुन्। निर्माण टिमले यसअघि नै फिल्मलाई तीजको अवसर पारेर आगामी भदौ २६ गतेदेखि प्रदर्शनमा ल्याइने घोषणा गरिसकेको छ।
शंकर कार्कीको निर्देशन रहेको 'टिका'लाई महिलाप्रधान कथावस्तुमा आधारित फिल्मका रूपमा प्रस्तुत गरिएको छ। फिल्ममा आकाश उखेडा र जीवन ढुंगेल मुख्य सहायक निर्देशकका रूपमा रहेका छन्।
फिल्ममा प्रियंका कार्की, वर्षा सिवाकोटी, महेश त्रिपाठी, निर्मल शर्मा, प्रकाश घिमिरे, रीना ढकाल, विविका पौडेल र आयुषी ढकालको प्रमुख अभिनय रहनेछ। 'टिका' नरेन्द्र मैनालीले खिचिरहेका छन्।
फिल्मको कथा शंकर कार्की र चन्दन झाले तयार गरेका हुन् भने पटकथा सुपरभाइजरको जिम्मेवारी विश्वास तिम्सिना (बिटी कान्छा) ले सम्हालेका छन्। फिल्ममा कालिप्रसाद बाँस्कोटा र केतन क्षेत्रीको संगीत रहनेछ।
