विश्वप्रसिद्ध कान्स फिल्म फेस्टिभलमा ठूलो सफलता हासिल गरेको नेपाली सिनेमा 'तिनीहरूः एलिफेन्ट्स इन द फग' को म्युजिकल ट्रेलर सार्वजनिक भएको छ।
कान्समा 'जुरी अवार्ड' प्राप्त गरेर अन्तर्राष्ट्रिय ख्याति कमाएपछि यो फिल्म आगामी भदौ १९ गतेबाट घरेलु दर्शकमाझ प्रदर्शनमा आउने तयारीमा छ। बुधबार काठमाडौंमा एक कार्यक्रमकाबीच फिल्मको ट्रेलर सार्वजनिक गरिएको हो।
ट्रेलरमा ग्रामीण भेगको एउटा बस्तीलाई जंगली हात्तीको त्रासले आक्रान्त पारिरहेको पृष्ठभूमि देखाइएको छ। कथा सीमान्तकृत किन्नर (तेस्रोलिंगी) समुदायको वरिपरि घुम्छ।
सन्तान हराएपछिको पीडा र आमाको संघर्षलाई ट्रेलरको केन्द्रमा राखिएको छ। मुख्य पात्रले हराएकी छोरीको खोजीका क्रममा प्रहरी प्रशासन र समाजका कठोर यथार्थ तथा बाधा-अवरोधहरूको सामना गर्नुपर्ने दृष्यहरू ट्रेलरमा समेटिएका छन्।
जंगली हात्तीको आतंकबाट आक्रान्त बस्तीमा बसोबास गर्ने अल्पसंख्यक समुदायको कथा फिल्मले भन्नेछ।
ट्रेलरको अर्को मुख्य आकर्षण यसको संगीत पक्ष हो। भोजपुरी लयको प्रभाव रहेको क्याची बिटको गीतमा तेस्रोलिंगी समुदायका व्यक्तिको ऊर्जावान् नृत्यले भिडिओलाई अझ आकर्षक बनाएको छ। यस गीतमा लव कर्णको शब्द तथा शिवानी भगत र देव अहिररावको स्वर रहेको छ।
'तिनीहरूः एलिफेन्ट्स इन द फग' अविनाशविक्रम शाहको निर्देशनमा बनेको हो। यसअघि आफ्नो लघुचलचित्र 'लोरी' बाट कान्समा पुरस्कार जितेका निर्देशक अविनाशले यस फिल्मको कथा सन्दीप बादलसँग मिलेर तयार पारेका हुन् भने पटकथा अविनाशकै हो। उनी 'कालो पोथी', 'शाम्बाला' र चर्चित सिरिज 'सिंहदरबार' का पनि पटकथाकार हुन्।
'तिनीहरूः एलिफेन्ट्स इन द फग'मा पुष्पा थिङ लामा, साहबदिन मिया, जस्मिन विश्वकर्मा, एलिज घिमिरे, जोएल गुरूङ, उमिषा पाण्डे, आकांक्षा कार्की, महिमा नवबाग, सञ्जय गुप्ता दुरा, आशान्त शर्मा, माओत्से गुरूङ, गौरी मल्ल, अनिल कुर्मीलगायत कलाकारहरूको अभिनय छ।
अन्तर्राष्ट्रिय सहकार्यमा नेपाल, फ्रान्स, जर्मनी, ब्राजिल र नर्वेका निर्माण संस्थाको सहकार्यमा फिल्म बनेको हो। निर्मातामा अनुप पौडेल, जस्टिन पेचबर्टी, डेमियन मेघेर्बी, माइकल हेनरिक्स रहेका छन्।
अन्तर्राष्ट्रिय फेस्टिभलमा वाहवाही बटुलीसकेको र कलात्मक कथाशैलीमा तयार पारिएको यो फिल्म अब नेपाली दर्शकका लागि प्रदर्शनमा आउन लागेको हो।
फिल्म कृष्ण जन्माष्टमीबाट नेपालभर प्रदर्शन हुनेछ।
