फिल्म वितरण संस्था एप्पल इन्टरटेन्मेन्टले फिल्म 'भिडियोटेप' निर्माण गर्ने भएको छ।
मंगलबार ललितपुरस्थित लबिम मलमा आयोजित पत्रकार सम्मेलनमार्फत फिल्मको औपचारिक घोषणा गरिएको हो।
ओबिद उद्दिनको लेखन तथा निर्देशनमा फिल्म निर्माण हुन लागेको हो। उनको यो फिचर डेब्यु फिल्म हुनेछ।
एड्भेन्चर हरर जनरामा निर्माण हुने फिल्मको छायांकन भदौ ४ गतेदेखि उपल्लो मुस्ताङमा सुरू हुनेछ। निर्माण टिमका अनुसार फिल्मको छायांकन ३० दिनसम्म चल्नेछ। फिल्मको अनुमानित बजेट ४ करोड रूपैयाँ रहेको जानकारी पनि कार्यक्रममा दिइयो।
फिल्ममा उपासना सिंह ठकुरी र कुन्दन शाक्य शीर्ष भूमिकामा देखिनेछन्। साथै अस्तित्व भट्टचन, कृशल श्रेष्ठ, रिसु राउत, जीवन अधिकारी, शेखर चापागाईं र सिद्धार्थ सिंहलगायत कलाकारहरूको पनि अभिनय रहनेछ।
पत्रकार सम्मेलनमा निर्देशक ओबिदले आफू सानैदेखि हरर फिल्म हेरेर हुर्किएको र त्यसैको प्रभावमा पहिलो फिल्म पनि यही जनरामा बनाउन लागेको बताए।
उनका अनुसार 'भिडियोटेप' साथीहरूको कथामा आधारित एड्भेन्चर हरर फिल्म हो। फिल्मको कथा पूर्ण रूपमा काल्पनिक विषयमा आधारित रहेको उनले स्पष्ट पारे।
अभिनेत्री उपासना सिंह ठकुरीले ओबिदसँग करिब एक वर्षअघिदेखि फिल्मबारे छलफल भइरहेको बताउँदै अब छायांकनमा जान पाउँदा निकै खुसी र उत्साहित रहेको प्रतिक्रिया दिइन्।
अभिनेता कुन्दन शाक्य यसअघि फिल्म ‘ताराहरू’ मा अभिनय गरिसकेका भए पनि शीर्ष भूमिकामा भने 'भिडियोटेप' बाट डेब्यु गर्न लागेका हुन्। उनले पनि फिल्मलाई लिएर उत्साहित रहेको बताए।
एप्पल इन्टरटेन्मेन्टका प्रमुख नकिम उद्दिन निर्माता रहेको फिल्ममा डीओपी वशिष्ट प्रधान, प्रोडक्सन म्यानेजर ईश्वर घिमिरे छन्। महेश बराल मुख्य सहायक निर्देशक हुन्।
एप्पल इन्टरटेन्मेन्टकी कार्यकारी निर्देशक विपश्यना श्रेष्ठले नेपाली फिल्म क्षेत्र र दर्शकका लागि केही नयाँ प्रस्तुत गर्ने उद्देश्यका साथ 'भिडियोटेप' निर्माण हुन लागेको बताइन्। उनले नयाँ सोच र नयाँ टिमसँग सहकार्य गर्दै फरक स्वादको फिल्म निर्माण गर्ने लक्ष्य रहेको धारणा राखिन्।
त्यस्तै, कार्यक्रममा एप्पल इन्टरटेन्मेन्टका प्रमुख नकिम उद्दिनले नयाँ टिमलाई साथ र सहयोग गर्न आग्रह गरे।
