सफल फिल्म फ्रेन्चाइज 'कबड्डी'को पाँचौं शृंखला 'कबड्डी ५: आफ्टर द फाइनल म्याच' को प्रदर्शन मिति घोषणा गरिएको छ।
फिल्म दसैंको टीकाको पर्सिपल्ट अर्थात् कात्तिक ६ गतेदेखि प्रदर्शनमा आउने भएको हो। निर्माण टिमले फस्र्टलुक पोस्टर सार्वजनिक गर्दै प्रदर्शन मिति घोषणा गरेको हो।
पोस्टरमा फिल्मका मुख्य पात्र काजी (दयाहाङ राई), बीके (विजय बराल) र छन्त्याल (बुद्धि तामाङ)लाई उनीहरूकै परिचित चरित्रमा प्रस्तुत गरिएको छ।
'कबड्डी'का यसअघिका चारवटै शृंखला बक्स अफिसमा सफल भएका छन्। चौथो शृंखला 'कबड्डी ४'ले करिब २२ करोड रूपैयाँको ग्रस कलेक्सन गर्दै त्यसबेलासम्मको सर्वाधिक कमाउने नेपाली सिनेमाको रेकर्डसमेत बनाएको थियो।
चौथो शृंखलालाई नै अन्तिम भागका रूपमा प्रस्तुत गरिएको भए पनि पात्रहरूको कथा अधुरो रहेकाले पाँचौं शृंखला निर्माण गरिएको निर्देशक रामबाबु गुरूङले बताएका छन्। उनका अनुसार नयाँ शृंखला केवल ब्रान्डको निरन्तरताका लागि नभई कथाको माग र पात्रहरूको अधुरो यात्रा पूरा गर्न निर्माण गरिएको हो।
बासुरी फिल्म्सको प्रस्तुतिमा बनेको फिल्मको लेखन तथा निर्देशन रामबाबु गुरूङले गरेका हुन्। फिल्ममा दयाहाङ राई, विजय बराल, बुद्धि तामाङ, विपीन कार्की, रिश्मा गुरूङ, सिर्जना गुरूङ, पुष्कर गुरूङ, कविता आले, अरूणा कार्की, शिशिर बाङ्देल, माओत्से गुरूङ, कमलमणि नेपाललगायत कलाकारहरूको अभिनय छ।
फिल्ममा निर्देशक गुरूङसहित मणिराम पोखरेल, मधु मिजार र विशाल गुरूङ (एलजी)को लगानी छ। सागर राज कार्यकारी निर्माता हुन्। त्यस्तै, संजय लामाको छायांकन तथा सुरेन्द्र पौडेलको सम्पादन छ।
नेपालमा ब्यांकटेश इन्टरटेनमेन्ट एन्ड टी फल्कले वितरण गर्ने फिल्मको विदेश वितरण अधिकार सेभेन सिज इन्टरनेसनलसँग रहेको छ।
-1746009348.jpg)
