अभिनेता निखिल उप्रेतीको निर्माण, निर्देशन तथा अभिनय रहेको फिल्म 'आचार्य'को ट्रेलर सार्वजनिक भएको छ।
प्रदर्शन तयारीमा रहेको फिल्मको करिब साढे तीन मिनेट लामो ट्रेलर शनिबार काठमाडौंमा आयोजित कार्यक्रममा सार्वजनिक गरिएको हो।
ट्रेलरमा निखिललाई दमदार एक्सन अवतारमा प्रस्तुत गरिएको छ। यसअघि सार्वजनिक टिजरमा देखाइएको एक्सनलाई ट्रेलरले थप विस्तार गरेको छ। तीव्र द्वन्द्वका दृश्य र एक्सन कोरियोग्राफीले फिल्म एक्सनप्रधान रहेको संकेत गर्छ।
निखिलले 'आचार्य'मार्फत फेरि एक्सन केन्द्रित भूमिकामा आफूलाई प्रस्तुत गरेका छन्। यो फिल्ममार्फत उनी एक दशकभन्दा लामो समयपछि निर्देशनमा फर्किएका हुन् भने अभिनयमा पनि लामो अन्तरालपछि कमब्याक गरेका हुन्।
नेपाली फिल्ममा पछिल्लो समय कम हुँदै गएको मास इन्टरटेनर शैलीलाई केन्द्रमा राखेर फिल्म निर्माण गरिएको निखिलले बताए। नेपाली बजेट, कन्टेन्ट र श्रमशक्तिबाट पनि अन्तर्राष्ट्रिय स्तरको मनोरञ्जनात्मक फिल्म बनाउन सकिने उद्देश्यले 'आचार्य' निर्माण गरिएको उनको भनाइ छ।
'हामी नेपाली फिल्मले पनि विदेशी शैलीका फिल्म बनाउन सक्छौं। त्यस्तो फिल्म बनाएर नेपाली दर्शकलाई मनोरञ्जन दिन सक्यौं भने जंग जित्नु छ,' निखिलले भने।
फिल्ममा निखिलसँगै दक्षिण भारतीय कलाकार रघु बाबू र रघु करुमन्चीको अभिनय छ। पूर्णिका सिजापती र सजिना श्रेष्ठले यही फिल्मबाट अभिनयमा डेब्यु गर्दैछन्। फिल्ममा दीपजंग राणा, रोहित चौधरी, ध्रुव कोइराला, सुरेश कोहली, रञ्जित कोइराला, जेसिका पोखरेललगायत कलाकारको पनि अभिनय छ। यो फिल्मको निर्माता कृष्ण भट्टराई हुन्।
सौरभ लामा, मनु विक र नवराज थापाको छायांकन रहेको फिल्मको एक्सन निर्देशन शुक्रराज शाहले गरेका हुन्। बन्दे प्रसादले सम्पादन गरेको फिल्मको टिजर तथा ट्रेलर सन्देश शाहले तयार पारेका हुन्।
फिल्मको नेपाल वितरण मनोज राठीले गर्नेछन् भने नेपालबाहिरको वितरण सेभेन सिज इन्टरनेसनलले गर्नेछ।
फिल्मको डिजिटल पार्टनर ओएसआर डिजिटल हो। 'आचार्य' असोज ९ गतेदेखि प्रदर्शनमा आउनेछ।
-1746009348.jpg)
