फिल्म 'चमेलीको पोइ'को ट्रेलर सार्वजनिक गरिएको छ। आइतबार राजधानीमा आयोजित कार्यक्रमबीच सार्वजनिक ट्रेलरमा हास्य पक्षलाई बढी प्राथमिकता दिइएको छ।
प्रेम, दाम्पत्य जीवनका उतारचढाव, विश्वासघात र पारिवारिक सम्बन्धलाई कमेडीमार्फत प्रस्तुत गरिएको देखिन्छ।
हास्यप्रधान ट्रेलरले फिल्म मनोरञ्जनात्मक रहेको संकेत गर्छ।
निर्देशक एभरेस्ट सूर्य बोहराको लेखन तथा निर्देशनमा बनेको 'चमेलीको पोइ' असोज १६ गतेदेखि देशभर प्रदर्शनमा आउँदैछ।
ट्रेलर सार्वजनिक गर्दै निर्देशक बोहराले फिल्म विशुद्ध मनोरञ्जनात्मक रहेको बताए। दर्शकलाई साढे दुई घण्टा मनोरञ्जन दिने उद्देश्यले फिल्म निर्माण गरिएको बताउँदै उनले फिल्मले मनोरञ्जनसँगै दर्शकको भावनालाई पनि छुने बताए।
करिब १८ वर्षपछि ठूलो पर्दामा फर्किएका हास्य अभिनेता नारायण त्रिपाठीले फिल्मबाट आफू आशावादी रहेको बताए। अमेरिकामा आयोजित विशेष प्रदर्शनमा दर्शकबाट पाएको प्रतिक्रियाले आफूलाई थप उत्साहित बनाएको उनको भनाइ छ।
अभिनेता मुकुन भुसालले फिल्मले दर्शकलाई भरपुर हँसाउनुका साथै केही ठाउँमा गम्भीर बनाउने बताए। विल्सन विक्रम राई, उमेश राई (फुलन्देकी आमा) लगायत कलाकारले पनि फिल्मप्रति आफूहरू आशावादी रहेको बताएका छन्।
अभिनेत्री सुरक्षा पन्तले निर्देशक बोहरासँग 'भैरे'पछि दोस्रोपटक सहकार्य गरेको बताउँदै आफूले चाहेजस्तो कथा, परिवेश र चरित्रमा काम गर्न पाएकोमा खुसी व्यक्त गरिन्।
धनलक्ष्मी सिने मेकर्सको ब्यानरमा निर्माण भएको फिल्ममा सुरक्षा पन्त, मुकुन भुसाल, नारायण त्रिपाठी, विल्सन विक्रम राई, रविन्द्र झा, उमेश राईलगायत कलाकारहरूको अभिनय छ।
शेरबहादुर तामाङको छायांकन रहेको फिल्मको लेखनमा बोहरालाई शिवम अधिकारीले सघाएका छन्।
सुनीता सापकोटा र रामनारायण उपाध्याय निर्माता रहेको फिल्मलाई आरआर फिल्मस्ले देशभर वितरण गर्दैछ।
-1746009348.jpg)
