अनमोल केसी र प्रिन्सी खतिवडा अभिनीत फिल्म 'बाटुलो जून'ले ठूलो ओपनिङ गरेको छ।
निर्माण पक्षको दाबी अनुसार फिल्मले पहिलो दिन १ करोड ३० लाख रूपैयाँभन्दा बढी ग्रस कलेक्सन गरेको हो। योसँगै 'बाटुलो जून' ले अनमोलको करिअरकै सबभन्दा ठूलो ओपनिङ गर्ने फिल्मको रेकर्ड बनाएको छ।
त्यति मात्र होइन, नेपाली फिल्ममा नन-सिक्वेलका रूपमा समेत यसले अहिलेसम्मकै ठूलो ओपनिङ गरेको निर्माण पक्षको दाबी छ।
बिहीबारदेखि प्रदर्शनमा आएको फिल्मले पहिलो दिन १ करोड २७ लाख रूपैयाँ ग्रस कलेक्सन गरेको आफूहरूलाई उपलब्ध डाटामा देखिएको निर्माता सरोज न्यौपानेले बताए। त्यसमा केही हलको थप हिसाब जोड्दा कुल व्यापार १ करोड ३० लाख रूपैयाँभन्दा बढी पुग्ने उनले बताए।
गत साता रिलिज भारतीय फिल्म 'रामायण'ले नेपाली हलमा आफ्नो दबदबा कायम राखिरहेका बेला 'बाटुलो जून' प्रदर्शनमा आएको हो। यद्यपि बलिउडको ठूलो फिल्मसँग प्रतिस्पर्धाका बीच पनि 'बाटुलो जून' ले बलियो व्यापार गरेको छ।
बिहीबार काठमाडौंसहित देशभरका हलमा फिल्मका शोमा दर्शकको उल्लेख्य उपस्थिति रहेको थियो। पहिलो दिन धेरै शो हाउसफुल भएका थिए।
अनमोलको करिअरकै ठूलो ओपनिङ, नन-सिक्वेलमा पनि नयाँ रेकर्ड
'बाटुलो जून'को पहिलो दिनको व्यापार अनमोल केसीको १२ वर्ष लामो फिल्मी करिअरकै सबभन्दा ठूलो ओपनिङ हो। यसअघि उनका कुनै पनि फिल्मले पहिलो दिन एक करोड रूपैयाँको आँकडा पार गर्न सकेका थिएनन्।
गत वर्ष प्रदर्शनमा आएको 'जेरी अन टप'ले पहिलो दिन ६३ लाख रूपैयाँ ग्रस कलेक्सन गरेको थियो। 'जेरी अन टप'का समेत निर्माता रहेका सरोज न्यौपानेले बिहीबार दिउँसै 'बाटुलो जून'ले उक्त फिल्मको पहिलो दिनको व्यापारलाई उछिनिसकेको जानकारी दिएका थिए।
'जेरी अन टप’को पूरै दिनको बिजनेस जति थियो, त्यो ‘बाटुलो जून’ले दिउँसो नै क्रस गरिसकेको थियो,' उनले भने।
निर्माता न्यौपानेको दाबी अनुसार ‘बाटुलो जून’ले अनमोलको व्यक्तिगत रेकर्ड मात्र तोडेको छैन, नन-सिक्वेल नेपाली फिल्मको पहिलो दिनको व्यापारमा पनि नयाँ रेकर्ड बनाएको छ।
पहिलो दिनको सफल ओपनिङपछि शुक्रबार पनि फिल्मको व्यापार उत्साहजनक देखिएको निर्माता न्यौपानेले बताए। उनका अनुसार शुक्रबार बिहान १०ः३० बजेसम्म फिल्मले ४० देखि ४२ लाख रूपैयाँसम्मको ग्रस कलेक्सन गरिसकेको छ।
दर्शकको मायाले उत्साहित अनमोल, प्रिन्सीलाई डेब्यूमै राम्रो प्रतिक्रिया
फिल्मका कलाकारहरू विभिन्न हलमा पुगेर दर्शकसँग भेटघाट गरिरहेका छन्। हल भिजिटका क्रममा अनमोलले दर्शकबाट प्राप्त मायाप्रति आभार व्यक्त गरे।
'एकदमै खुसी छु। मेरा दर्शकहरूलाई थ्यांक यू भन्न चाहन्छु। राम्रो प्रतिक्रिया दिनुभएको छ। दर्शकको माया नै हाम्रो लागि सबै कुरा हो,' उनले भने।
फिल्मबाट अभिनेत्रीका रूपमा डेब्यू गरेकी प्रिन्सी खतिवडा पनि दर्शकको प्रतिक्रियाले उत्साहित देखिइन्। दर्शकसँगै बसेर फिल्म हेरेकी उनले पहिलो फिल्ममै यति धेरै माया पाउने अपेक्षा नगरेको बताइन्।
'यति धेरै दर्शकको माया यसरी डेब्यू फिल्ममै पाउँछु भनेर कल्पना नै गरेकी थिइनँ। एकदमै धेरै खुसी छु,' उनले भनिन्।
भुवनलाई सम्झना आयो 'कुसुमे रूमाल'को
फिल्मका निर्देशक तथा अभिनेता भुवन केसीले दर्शकको माया देख्दा आफ्नो पुरानो फिल्म 'कुसुमे रूमाल'को समय सम्झिएको बताए। उनले दर्शकको उत्साहले आफूलाई पुराना दिनको स्मरण गराएको सुनाए।
'दर्शकको माया देख्दा ‘कुसुमे रूमाल’को झलझली याद आइरहेको छ। त्यतिबेला पनि यसैगरी अपार माया दिनुहुन्थ्यो। म आफैं पनि छक्क पर्थें, मैले के गरेको छु र जस्तो लाग्थ्यो। मेरो सिनेमाप्रति अहिलेसम्म पनि दर्शकले अपार माया दिइरहेको देख्दा एकदमै खुसी छु,' उनले भने।
भुवन केसी निर्देशित 'बाटुलो जून'मा अनमोल र प्रिन्सी मुख्य भूमिकामा छन्। साथमा भुवन केसी, गरिमा पन्त, न्यान्सी खड्का, प्रकाश घिमिरे, लक्ष्मीनाथ तिमिल्सिना र लक्ष्मी गिरीलगायत कलाकारको अभिनय छ। गरिमा पन्तले यही फिल्ममार्फत वर्षौपछि अभिनयमा कमब्याक गरेकी हुन्।
वि.सं. २०४० को दशकको नेपाली सामाजिक तथा सांस्कृतिक परिवेशमा आधारित भनिएको फिल्मको कथा सामीप्यराज तिमल्सेना र सरिन पोखरेलले लेखेका हुन्।
