युवा पुस्तामाझ लोकप्रिय गायक एकदेव लिम्बुको नयाँ गीत 'चमेली' यतिबेला चर्चामा छ। यो गीतको शब्द, संगीत र म्युजिक भिडिओलाई दर्शकहरूले मन पराइरहेका छन्।
गीत चर्चामा रहनुको अर्को विशेष कारण भने यसमा अभिनेत्री निरूता सिंहको केमियो उपस्थिति पनि हो।
भिडिओमा निरूताको सरप्राइज इन्ट्रीले दर्शकलाई थप उत्साहित बनाएको छ। निरूतासँग सहकार्य गर्न पाएको अनुभवबारे एकदेवले आफू निकै प्रभावित भएको बताएका छन्। उनले भने, 'हम्बलनेस भन्ने कुरा मैले उहाँबाट सिकें। यत्तिकै यति धेरै फिल्म दिनुभएको रहेनछ। यत्तिकै आफ्नो समयको नम्बर वान नायिका बन्नुभएको रहेनछ।'
एकदेवका अनुसार निरूतासँगको सहकार्य 'माइन्ड ब्लोइङ' अनुभव रह्यो। दर्शकबाट निरूताको उपस्थितिलाई लिएर सकारात्मक प्रतिक्रिया आइरहेको भन्दै उनले खुसी व्यक्त गरे।
'उहाँले नाइन्टिजको झझल्को दिलाइरहनुभएको छ। मेरो फेभरेट हिरोइनलाई केमियो गराउन पाउँदा निकै खुसी लागेको छ,' उनले भने।
आफू 'दर्पण छायाँ' फिल्मको अहिले पनि प्रशंसक रहेको एकदेव बताए। एकदेवका 'आँखामा आउने सपनी', 'शिरफूल', 'झिमझिमाउने आँखा' जस्ता दर्जनौं गीतहरु चर्चित छन्। 'झिमझिमाउने आँखा'को हिन्दी भर्सनमा एकदेवले भारतीय गायिका नेहा कक्करसँग समेत सहकार्य गरिसकेका छन्।
नयाँ गीत 'चमेली' को कुरा गर्नुपर्दा यसमा निरूता सिंह, आकृति नेगी, दिकिला शेर्पाको अभिनय छ। भिडिओका निर्देशक अन्जन लिम्बु हुन्।
