र्यापर डिके सागर (यादव सरकार)को कन्सर्टबाट संकलित रकम प्रधानमन्त्री दैवी प्रकोप उद्धार कोषमा जम्मा गरिएको छ।
जडीबुटीस्थित क्लब १८ मा आयोजित 'डिके सागर (यादव सरकार) लाइभ विथ सेलो नाइट' कन्सर्टबाट संकलित १ लाख १ हजार रूपैयाँ कोषमा जम्मा गरिएको हो।
भदौ १७ गते आयोजना गरिएको कन्सर्टको डोर सेल्सबाट संकलित रकम क्लब १८ ले शुक्रबार प्रधानमन्त्री दैवी प्रकोप उद्धार कोषमा जम्मा गरेको हो।
बाढी तथा प्राकृतिक विपत्तिबाट प्रभावित नागरिकलाई सहयोग गर्ने उद्देश्यले कन्सर्टको डोर सेल्सबाट प्राप्त रकम राहत तथा सहयोगमा खर्च गर्ने घोषणा आयोजकले कार्यक्रमअघि नै गरेको थियो।
कन्सर्टमा मैथिली र्याप 'जनचेतना' मार्फत चर्चामा आएका र्यापर डिके सागर (यादव सरकार) को मुख्य प्रस्तुति रहेको थियो। कार्यक्रममा गायक आश्रम थिङ र गायिका अनिशा तामाङले समेत प्रस्तुति दिएका थिए।
मनोरञ्जनसँगै सामाजिक उत्तरदायित्वलाई जोडेर आयोजना गरिएको उक्त कार्यक्रमबाट संकलित रकम विपद् प्रभावित नागरिकको सहयोगमा प्रयोग गर्ने प्रतिबद्धताअनुसार कोषमा जम्मा गरिएको क्लब १८ ले जनाएको छ।
क्लब १८ का सञ्चालक सुजन श्रेष्ठले संगीत र मनोरञ्जनमार्फत संकलित रकम विपद् प्रभावित नागरिकको सहयोगमा योगदान पुगोस् भन्ने उद्देश्यले कोषमा जम्मा गरिएको बताए।
-1746009348.jpg)
