बिहानको झिसमिसेसँगै चक्रपथमा कुद्ने लोकल तर अरू बसहरू भन्दा फरक बा.५ ख.९१०६ शुभकामना नामको बसमा चढ्ने जो कोहीलाई पनि लाग्न सक्छ चक्रपथमा गुड्ने बसका गुरूहरूको सोच यत्तिको भैदिए सार्वजनिक बसको प्रयोगमा कति धेरै सुधार हुने थियो होला भनेर।
यो बस बाहिरबाट हेर्दा अन्य बस जस्तै साधारण देखिएता पनि तपाईंले बस चढ्दा टेक्ने खुड्किलोको बायाँ छेउदेखि नै अनौठो आभास पाउनुहुनेछ।
पहिलो पाइलाको ढोकामै 'लब गुरू'को व्यक्तिगत विवरण पढ्न पाउनु हुनेछ, जहाँ उनको वास्तविक नाम‚ शैक्षिक विवरण‚ यात्रुहरूले पाउने छुट सुविधा तथा बोनसको बारेमा समेत सम्पूर्ण जानकारी रंगीन अक्षरले लेखिएको देख्न सकिन्छ।
बसभित्र प्रवेश गरिसकेपछि सफा चिटिक्क परेको सिट त पाइनै हालिन्छ तर गुरूको सिटभन्दा पछाडि पट्टि पिउनको लागि पानीको जार र बसको छानोको भित्तामा सानो डोको जसलाई फोहोर फाल्ने प्रयोजनका साथ हरेक ३ वटा सिटको माथि राखिएको छ।
बस सजावटको लागि डिस्को लाइटदेखि माइक सम्मको व्यवस्था भएको 'लब गुरू' को बसमा गुरू आफैले तपाईंलाई बिहानको शुभकामना शुभ दिनको प्रार्थना र विद्यार्थीहरूलाई फिर्ता पैसासँगै चकलेट बोनसको उपहार दिने व्यवहारले बसमा सवार यात्रुहरूलाई आश्चार्य चकित नपार्ने त कुरै भएन।
यो बसमा पहिलो पटक यात्रा गर्ने यात्रुलाई त अनौठो नलाग्ने कुरै भएन तर जो व्यक्ति एक पटक चढिसकेका छन्, उसलाई पनि पटक पटक यही बसमा यात्रा गर्ने रहर जाग्छ।
बसमा सवार एक यात्रुको भनाइ अनुसार 'म त सधैं बिहानीमा यही रूट प्रयोग गर्नुपर्छ, उनको आउने समय र मेरो जाने समय ठ्याक्कै मिलाएर बस कुर्छु। धेरैजसो हाम्रो समय उस्तै नै हुन्छ, त्यसैले कहिलेकाहीँ ढिलै भए पनि उनैलाई कुर्छु।'
'लब गुरू'ले चक्रपथको यात्रुको मात्र नभई पर्यटकहरूको पनि मन जित्न सफल भएका रहेछन्। उनले यो बस भ्याली बाहिर पोखरा, रारा, मनाङ लगायतका अन्य थुप्रै पर्यटकीय ठाउँहरू पुगी पर्यटकलाई मनोरञ्जन पूर्ण यात्रा गराएको अनुभव गर्वका साथ सुनाउँछन्।
स्थायी बसोबास रामेछाप रहेको प्रेम लामाको संगत युवा अवस्थामा हेटौंडाका ट्रक ड्राइभरसँग रहेको र साथीकै संगतले उनले पनि गाडी चलाउने सोच बनाएका रहेछन्। तर सुरू गर्न पैसा चाहिन्थ्यो। त्यसैले दुबईमा रहेर केही वर्ष ड्राइभर पेसा नै गरेपछि उनी नेपाल फर्किए।
नेपालमा अब के गर्ने त भन्ने सोचका साथ अघि बढेका उनले पुरानै साथीले दिएको सल्लाहको स्मरण गर्दै चक्रपथमा आफ्नै बस चलाउन सुरू गरे।
बस चलाउँदै गर्दा उनलाई हेटौंडाका साथीको केही कुराले झकझकाउने मात्र हैन ट्रक साहित्यले पनि मनमा अमिट छाप बसाएको मिठो कहानी सुनाउँछन्।
उनी भन्छन्- मेरो साथीले ट्रक चलाउँदा ट्राफिकले धेरै केरकार गर्ने भएकोले आफ्नो साइड पट्टिको झ्यालमा नाम, ठेगाना, सम्पर्क नं. ब्लु बुक नं. सहितको सम्पूर्ण विवरणहरू प्रिट गरी देखाएको कुरा उनी स्वयंले नै भोगेको भएर उनले पनि यही कुराको सिको गरेको बताउँछन्।
स्वयम्भुबाट सुरू हुने उनको बिहानी कलंकी‚ कालीमाटी‚ त्रिपुरेश्वर‚ बानेश्वर हुँदै भक्तपुरको बालकोटसम्म पुगेर फर्किन्छ।
उनले यो रूटमा राति अबेरसम्म गरी दिनमा भ्याएसम्म ५ पटक परिक्रमा गर्ने गरेको बताउँछन्।
राजधानीमा कुद्ने अधिकांश सार्वजनिक यातायातको अभद्र व्यवहारहरू सामाजिक सञ्जालहरूमा व्याप्त भैरहँदा यस्तो सार्वजनिक यातायातको सङ्ख्या बढ्ने र उनले सिको गरेजस्तै उनको पनि सिको अरू गुरूहरूले गर्ने हो भने सार्वजनिक यातायत चढ्दा आउने गुनासोहरू कति कम हुन्थे होलान्। यसरी सार्वजनिक यातायातमा यात्रुहरू आकर्षित भैरहँदा यस्तै अवधारणाका अन्य सार्वजनिक बसहरू पनि सञ्चालन हुने हो भने यस्तो कार्यले निजी सवारीको चाप त कम हुन्थ्यो होला नै साथै वातावरण प्रदूषण न्युनीकरणमा समेत सहयोग पुग्ने देखिन्छ। यस कुरामा सरकारको ध्यान जान जरूरी छ।
-1746009348.jpg)
