भदौ २४ गते जापानको टोकियोस्थित सिनओकुबोमा रहेको तोयामा पार्कमा नेपालीहरूले प्रदर्शन गरे। प्रदर्शन गर्नुको कारण थियो, २३ गते जेनजी पुस्ताले गरेको आन्दोलनमा प्रहरीले गरेको दमन र ज्यादती।
तर पार्कमा भेला भएका नेपालीहरूले तत्कालीन प्रधानमन्त्री केपी शर्मा ओली विरूद्ध चर्का नाराबाजी गरे अनि हल्ला पनि।
होहल्ला धेरै भएपछि स्थानीय १/२ जनाले उजुरी दिएको अनि प्रहरी आएर तितरबितर पारेको गैरआवासीय नेपाली संघ (जापान) का अध्यक्ष सुभास लामिछानेले सेतोपाटीलाई बताए। उनका अनुसार ५ बजे भेला भएकाहरू राति साढे ८ बजेसम्म बसेका थिए।
'सुरूमा २०/५० जना मान्छे भेला भएर मौन धारण मात्र गर्ने भनेर २/३ जना साथीहरूले अनुमति माग्नुभएको रहेछ। तर त्यहाँ १५ सय मान्छे भेला भएछन्,' लामिछानेले भने, 'हल्ला धेरै भएपछि प्रहरी आएको थियो। भर्खर आएका भाइबहिनीहरूले नटेरेपछि प्रहरीले तितरबितर समेत पारेको थियो।'
यो घटनालाई लिएर सामाजिक सञ्जालमा धेरै खालका हल्ला फैलाइएको भए पनि त्यसमा कुनै सत्यता नरहेको लामिछानेको दाबी छ। त्यही घटनालाई लिएर सरकार समक्ष गुनासो गरिएको अनि कतिलाई फिर्ता पठाउने लागिएको भन्ने खबरहरू नपत्याउन समेत उनले आग्रह गरेका छन्।
अब आइन्दा यस्ता घटना नदोहोर्याउन सचेत भने गराइएको उनले बताए।
'हामीले त्यहाँ धेरै हल्ला हुन्छ भनेर हलमा कार्यक्रम गरेका थियौं। त्यही दिन जापानको अपराध अनुसन्धान विभागबाट मलाई सोधपुछ भएको थियो,' उनले भने, 'यहाँको अनुसन्धानले आयोजकसँग सोधपुछ गरेर अब आइन्दा यस्ता घटना नदोहोर्याउन भन्न मात्र खोजेको हो। तर आयोजक को-को थिए भन्ने नै ठम्याउन गाह्रो भएको छ।'
यस्ता घटनाप्रति सचेत रहन पर्ने भए पनि यसकै कारण नेपालीलाई जापानबाट निकाल्ने, भिसामा कडाइ गर्ने भन्ने नहुने लामिछानेको भनाइ छ।केही समयअघि भएका अन्य विदेशीसँग सम्बन्धित घटनाका क्लिपलाई जोडेर भिडिओ बनाइएको समेत उनले बताए।
उनका अनुसार त्यहाँको स्थानीय सरकारविरूद्ध जापानिजहरूले गरेको प्रदर्शनका क्लिपलाई जोडेर समेत भिडिओ राखिएको छ।
'प्रहरी आएपछि प्रदर्शनकारीहरू पार्कबाट बाहिर निस्किएको भए हुन्थ्यो। तर कतिपय व्यक्तिहरू रक्सी खाएर समेत गएको पाइएको छ,' उनले भने, 'ठूलो भीड देखेर आयोजक साथीहरू नै हिँडेपछि उनीहरूले थप होहल्ला गरेका रहेछन्। भाइबहिनीहरू अलि धेरै इमोसनल पनि भए होलान्।'
यो घटनाबाट पाठ सिक्न भने जरूरी रहेको उनको सुझाव छ। प्रहरीले खोजी गरेको भए त्यही दिनमा नियन्त्रण लिन सक्ने भन्दै उनले सोही घटनाका कारण कसैले कारबाही भोग्न नपर्ने बताए।
उनका अनुसार कतिपय स्थानीय टिकटकरहरूले अरूको देशमा आएर नाराबाजी गर्नुको सट्टा आफ्नै देशमा जानुपर्ने भन्दै आलोचना गरेर भिडिओ बनाएका छन्। तर उनीहरूले पनि भाइरल हुनका लागि मात्रै यस्तो गरेको उनको बुझाइ छ।
आगामी दिनमा यस्ता घटना दोहोरिन नदिनका लागि लामिछानेले केही सुझाव दिएका छन्।
पहिलो- जापानको नियम कानून बुझ्न जरूरी छ। यहाँ आइसकेपछि के गर्न पाइन्छ के गर्न पाइँदैन भनेर जानकारी राख्नु पर्छ। आफैले बुझ्न सकिएन भने जापानमा बस्दै आएकाहरूसँग सोध्नु पर्छ।
दोस्रो- अरूको स्वतन्त्रता ख्याल गर्नुपर्छ। जापानमा अरूलाई डिस्टर्व नहुने गरी सडकमै खाएर हिँड्न पनि पाइन्छ। तर त्यसले अरूलाई हानि गर्न हुँदैन।
तेस्रो- नेपालको मामिलालाई लिएर होहल्ला नगरेकै राम्रो हो। देशमा आन्दोलन हुँदा त्यसबारे सबैलाई चासो हुन्छ। तर हामीले जापानबाट चासो लिँदैमा केही हुने होइन। जस्तो जापानमा प्रदर्शन हुँदै गर्दा नेपालमा प्रधानमन्त्री केपी शर्मा ओलीको राजीनामा आइसकेको थियो। यहाँ प्रदर्शन गरेको भरमा आउने पनि होइन। त्यसैले यस्ता कुरामा गम्भीर हुन जरूरी छ।
गैरआवासीय नेपाली संघ (जापान) का अध्यक्ष सुभास लामिछाने
-1758107792.jpg)
-1746009348.jpg)
