प्रतिनिधि सभाको बैठकमा सरकारले बजेट सम्बन्धि प्रतिस्थापन विधेयक ल्याउने तयारी गरेको छ।
आज बस्ने प्रतिनिधि सभा बैठकमा केपी ओली सरकारले ल्याएको बजेट अध्यादेशलाई स्वीकृत गराउने र केही दिन भित्रै प्रतिस्थापन विधेयक संसदमा पेश गर्ने तयारी गरेको हो।
सरकारले बजेट खर्च गर्न भदौ ३० गतेसम्म प्रतिस्थापन विधेयक ल्याइसक्नुपर्छ। संसदको अघिल्लो अधिवेशनमा नै बजेट सम्बन्धि अध्यादेश टेबल भएको थियो। भदौ ३० गते त्यसको ६० दिन पुग्दैछ। साठी दिन भित्र संसदबाट उक्त अध्यादेशको प्रतिस्थापन विधेयक पास नभए खारेज हुने व्यवस्था छ। त्यसैले सरकार बजेट अध्यादेश अघि बढाउन कस्सिएको हो।
प्रतिनिधि सभाको बैठकमा आज आर्थिक अध्यादेश पेश गर्ने कार्यसूची छ। यसअघि सम्भावित कार्यसूचीमा १५ वटा अध्यादेश सम्बन्धी कार्यसूची प्रकाशित गरिएकोमा बैठक अघि छोट्याएर आर्थिक अध्यादेश, राष्ट्र ऋण उठाउने अध्यादेश र विनियोजन अध्यादेश स्वीकृत गरियोस् भन्ने प्रस्ताव मात्र राखिएको छ।
प्रतिनिधि सभाको आजको पहिलो बैठकमा पनि नेकपा एमालेले नाराबाजी सहित रोष्टम घेराउ गरेको छ। सभामुख अग्नि सापकोटाले पटक पटक नाराबाजी रोकेर अन्य सांसदहरुलाई बोल्न दिन आग्रह गरेपनि एमालेले नाराबाजी गरको हो। एमालेको नाराबाजीपछि बैठक १५ मिनेटका लागि स्थगित भएको छ।
के भयो आजको पहिलो बैठकमा
सभामुख अग्नि सापकोटाले प्रतिनिधि सभा बैठक सुरु भएको घोषणा गरे लगत्तै एमाले सांसदहरु रोष्टम घेर्न आइपुगे। उनीहरुले संसदीय मर्यादा कायम गर्न र भेदभावपूर्ण व्यवहार बन्द गर्न माग गर्दै नाराबाजी गरे।
नेकपा एमालेले गत भदौ १ गते सभामुख सापकोटालाई पार्टीबाट १४ सांसदलाई कारवाही गरिएको सूचना दिएको थियो।
एमालेले सूचना प्रकाशित गर्न सभामुखलाई दबाब समेत दिएको थियो। तर सभामुख सापकोटाले सरकारले ल्याएको राजनीतिक दल सम्बन्धि अध्यादेश अनुसार नयाँ दल दर्ता भएको उल्लेख गर्दै भदौ १३ गते कारवाहीको सूचना प्रकाशित नगर्ने निर्णय गरेका थिए।
विगतमा सभामुख सापकोटाले माओवादीले कारवाही गरेका टोपबहादुर रायमाजी लगायतका सांसदहरुबारेको सूचना २४ घण्टा नबित्दै प्रतिनिधि सभामा सुनाएपनि एमालेको कारवाहीको सूचना समयमा नदिनु पक्षपातपूर्ण भएको एमालेको आरोप छ।
एमाले सांसदहरुले नाराबाजी गरेपनि सभामुख सापकोटाले उक्त विषयमा सर्वोच्चमा मुद्दा विचाराधीन रहेकाले नाराबाजी नगर्न आग्रह गरे। संविधानको धारा १०५ मा अदालतमा विचाराधीन मुद्दामा संसदमा छलफल र बहस गर्न बन्देज गरिएको छ।
सापकोटाले एमाले सांसदहरुलाई बाढी पहिरो देखि सीमा समस्यासम्म छलफल गर्न सांसदहरुले माग गरेकाले संसद अवरोध नगर्न आग्रह गरे। तर एमाले सांसदहरुले नाराबाजी गरिरहे। मर्यादापालकहरुले एमाले सांसदहरुलाई रोष्टममा उक्लिने बाटो भन्दा अघि नै रोकीराखेका छन्।
एमाले सांसदहरुले नाराबाजी गरिरहँदा भीम रावल, घनश्याम भुसाल, इश्वर पोखरेल, सुवास नेम्वाङ लगायत छुट्टै उभिएका थिए। प्रमुख प्रतिपक्षी एमाले नेता केपी ओली कुर्सीमा बसिरहे।
सत्तापक्षका सांसदहरुले बोल्न समय माग्दै टेबल ठोकेपनि एमाले सांसदहरुले अवरोध कामय राखे। 'अरु सांसदहरुलाई बोल्ने मौका दिनुहोस्। अरु माननीय सदस्यले पनि देशका जल्दाबल्दा समस्याबारे बोल्न चाहानु भएको छ', सापकोटाले भने, 'सीमा समस्या । बाढी पहिरोका समस्या छन्। आफ्ना धारणा राख्न बैठक सञ्चालन गर्न सहयोग गर्नुहोस्।'
एमालेले अवरोध जारी राखेपछि सभामुख सापकोटाले पहिलो बैठक स्थगित गरेका छन्।
