बिजुली गाडी किन्नका लागि स्टान्डर्ड चार्टड बैंकले ६.३३ प्रतिशत ब्याजमै ऋण दिने भएको छ।
बैंकले हालको आधार दर ५.३३ मा १ प्रतिशत प्रिमियम मात्रै थपेर यस्तो ऋण दिने भएको बैंकका ब्राण्ड तथा मार्केटिङ सहयोगी विशाल सुवेदीले जानकारी दिए। वाणिज्य बैंकहरुमा स्टान्डर्ड चार्टर्डको आधार दर सबैभन्दा कम छ।
यस्तो ऋण ७ वर्षसम्मका लागि लिन सकिन्छ। अर्थात ऋण लिएपछि ७ वर्षभित्र ब्याज र साँवाको केही हिस्सा किस्ताबन्दीका रुपमा चुक्ता गर्दै जान सकिनेछ।
सुवेदीले भने ‘बिजुली सवारी प्रवद्र्धन र दिगो विकासको लक्ष्य हासिलका लागि सहयोग गर्न बैंकले सस्तो ब्याजमा ऋण प्रदान गर्न लागेको हो।’ बिजुली गाडीमा कुल मूल्यको ८० प्रतिशतसम्म बैंकबाट ऋण लिन पाउने व्यवस्था छ।
अन्य पेट्रोलियम सवारीसाधनका लागि भने ५० प्रतिशत मात्रै ऋण पाइने व्यवस्था छ।
त्यस्तै ऋण लिएको दोस्रो वर्षबाट भने आधार दरमा १.५ प्रतिशत मात्रै प्रिमियम थप गरेर ब्याजदर निर्धारण हुने उनले बताए। ‘ऋणको ब्याजदर निर्धारण आधार दरको उतारचढावमा भर पर्ने हो’ उनले भने।
ऋण प्राप्त गर्ने प्रक्रिया धेरै सरल रहेको बैंकको दावी छ। ऋणको लागि समग्र प्रक्रिया र कागजात पुरा गरेको २/३ दिनमै स्वीकृति हुने बैंकले जनाएको छ।
नेपालमा बिजुली सवारीको थालनी भएदेखि नै ऋण प्रदान गर्न बैंकले प्राथमिकता दिँदै आएको जनाएको छ। विगतमा धेरै ऋण बुकिङ भएको र केही आवेदन स्वीकृतको प्रक्रियामा रहेको स्टान्डर्ड चार्टडले जनाएको छ।