साताको अन्तिम कारोबार दिन अर्थात् बिहीबार नेप्से परिसूचक सामान्य अंकले बढेको छ।
नेप्से ४.५९ अंकले बढेर २६४०.५४ विन्दुमा बन्द भएको हो।
बिहीबार नेप्से परिसूचक बढे पनि कारोबार रकम भने अघिल्लो दिनको तुलनामा घटेको छ।
अघिल्लो कारोबार दिन पाँच अर्ब १७ करोड रूपैयाँको सेयर कारोबार भएकोमा यसदिन उक्त रकम घटेर चार अर्ब ९० करोड रूपैयाँमा सीमित भएको छ।
यसदिन ३२८ वटा धितोपत्रको एक करोड चार लाख ३१ हजार ७६० कित्ता सेयर किनबेच भएको हो।
बिहीबार १२९ कम्पनीको सेयरमूल्य बढेको छ भने ११५ वटाको घटेको छ। यस्तै, १५ कम्पनी स्थिर छन्।
यसदिन सान्भी इनर्जीको मूल्य सर्वाधिक ८.१६ प्रतिशतले बढेर प्रतिकित्ता मूल्य ७९५ रूपैयाँ पुगेको छ।
यस्तै, एसवाई प्यानलको मूल्य ५.७१ प्रतिशतले बढेको छ। उक्त कम्पनीको प्रतिकित्ता मूल्य एक हजार २५८ रूपैयाँ पुगेको छ।
यसैगरी, सुपर मादी हाइड्रोपावरको मूल्य सर्वाधिक ३.९० प्रतिशतले घटेर प्रति कित्ता मूल्य ५१८ रूपैयाँमा झरेको छ।
बिहीबार एसवाई प्यानलको सर्वाधिक कारोबार भएको छ।
उक्त कम्पनीको प्रतिकित्ता २० करोड ६ लाख बराबरको सेयर कारोबार भएको हो।
सर्वाधिक सेयर खरिद–बिक्री हुने दोस्रो सूचीमा बन्दीपुर केबलकार रहेको छ। उक्त कम्पनीको ८३३ रूपैयाँमा १७ करोड ६० लाख रूपैयाँ बराबरको सेयर कारोबार भएको छ।
त्यस्तै, आज कारोबारमा आएका १३ वटा समूहगत परिसूचकमध्ये ६ समूहको परिसूचक घटेको छ भने बाँकी सात समूहको परिसूचक बढेको छ।
यसमध्ये होटल्स तथा पर्यटन समूहको परिसूचक सर्वाधिक ०.४० प्रतिशतले बढेको छ।
-1756446574.jpg)
-1746009348.jpg)
