रिलायन्स स्पिनिङ्ग मिल्सले बुक बिल्डिङ प्रक्रियामार्फत् सेयर निष्कासन गर्ने भएको छ।
कम्पनीले माघ १० गतेदेखि योग्य संस्थागत लगानीकर्ताहरूका लागि बोलकबोलमार्फत् सेयर निष्कासन गर्न लागेको हो।
कम्पनीले जारी पुँजी १ अर्ब ९० करोड रूपैयाँको १०.१४ प्रतिशतले हुन आउने १९ करोड २६ लाख ६० हजार रुपैयाँ बराबरको प्रतिकित्ता १०० रुपैयाँ अंकित मूल्यका १९ लाख २६ हजार ६०० कित्ता सेयर बुक बिल्डिङ प्रक्रियामार्फत् निष्कासन गर्न लागेको हो।
सोमध्ये ४० प्रतिशत अर्थात् ७ लाख ७० हजार ६४० कित्ता शेयर बिक्री मूल्य सीमा ६०८ रूपैयाँदेखि ९१२ रूपैयाँ सम्मभित्र रही नेप्सेले सञ्चालन गर्ने बोलकबोल प्रक्रियामा योग्य संस्थागत लगानीकर्ताहरू सहभागी गराई बोलकबोलमार्फत् सेयर बिक्री गर्न लागेको हो।
उक्त सेयरमा माघ १४ गतेसम्म शिलबन्दी बोलपत्र पेस गर्न सकिन्छ।
कम्पनीको धितोपत्र निष्कासन तथा बिक्री प्रबन्धक ग्लोबल आइएमई क्यापिटल लिमिटेड रहेको छ।
योग्य संस्थागत लगानीकर्ताहरूले नेपाल स्टक एक्सचेञ्जको रजिष्टर्ड कार्यालय, युएनआई शान्तिमार्ग, भद्रकालीमा बोलपत्र आवेदन फारम रितपूर्वक भरी शिलबन्दी गरिएको गोप्य बोलपत्र फारम बुझाउनु पर्नेछ।
कम्पनीलाई केयर रेटिङ नेपालले 'केयर एनपी सिंगल ए माइनस इस्युअर रेटिङ' प्रदान गरेको छ। यसले कम्पनी समयमा नै सुरक्षित रूपले वित्तीय दायित्व बहन गर्न पर्याप्त क्षमता रहेको हो भन्ने बुझाउँछ।
