नेपाल राष्ट्र बैंकले बैंक तथा वित्तीय संस्थामा रहेको सर्वसाधारणको निक्षेप पूर्ण रूपमा सुरक्षित रहेको जानकारी गराएको छ।
राष्ट्र बैंकले मंगलबार एक विज्ञप्ति जारी गर्दै यस्तो जानकारी गराएको हो।
'बैंक तथा वित्तीय संस्था सञ्चालनको पछिल्लो अवस्था हेर्दा समग्र बैंकिङ क्षेत्र सक्षम र सबल रहेको र यस बैंकले बैंक तथा वित्तीय संस्थाको कारोबारको नियमित निगरानी गरिरहेकोले सर्वसाधारणको निक्षेप पूर्ण रूपमा सुरक्षित रहेको व्यहोरा अनुरोध छ,' विज्ञप्तिमा उल्लेख गरिएको छ।
कतिपय व्यक्ति तथा समूहले निश्चित बैंकहरू तोकेर भ्रामक प्रचार गरेको भन्दै राष्ट्र बैंकले गम्भीर ध्यानाकर्षण भएको जनाएको छ। अहिले कतिपय बैंकहरूमा निक्षेप झिक्नेहरू उल्लेखनीय बढेपछि राष्ट्र बैंकले अवस्था ठिक भएको जानकारी गराएको हो।
राष्ट्र बैंकले नियमन गरेका वाणिज्य बैंक, विकास बैंक तथा वित्त संस्थाहरूमा कुनै प्रकारको समस्या नभएको विज्ञप्तिमा उल्लेख गरिएको छ।
'पछिल्लो समयमा इजाजतपत्र प्राप्त बैंक तथा वित्तीय संस्थाहरूको पुँजीकोषको अवस्था, कर्जा निक्षेप अनुपातको अवस्था एवम् तरलताको अवस्थासम्बन्धी परिसूचकहरू यस बैंकको निर्देशनअनुरूप नै रहेको छ। कुनै बैंक तथा वित्तीय संस्थामा यी परिसूचकहरू तथा कर्जा, संस्थागत सुशासन लगायतका अन्य विषयमा कुनै समस्या देखिएमा यस बैंकले समय–समयमा आवश्यक निर्देशन दिई सुधार गराउँदै आइरहेको छ,' जारी विज्ञप्तिमा भनिएको छ।
बैंकिङ जस्तो संवेदनशील क्षेत्रप्रति सर्वसाधारणलाई भ्रमित गर्न दुष्प्रचार गर्ने कार्यको पछाडि नलागी सम्बद्ध लगानीकर्ता, निक्षेपकर्ता, ग्राहक तथा सरोकारवालालाई ढुक्कसँग नियमित रूपमा बैंकिङ कारोबार गर्न समेत राष्ट्र बैंकले अनुरोध गरेको छ।
