नेप्से परिसूचक साढे २ महिनायताकै न्यून विन्दुमा आइपुगेको छ। बिहीबार बजार बन्द हुँदा नेप्से २०.७६ अंकले घटेर २००५.८३ विन्दुमा आइपुगेको हो।
यसअघि नेप्से मंसिर २८ गते १९९४.६० विन्दुमा थियो। बिहीबार नेप्सेले २००० को विन्दुमा टेवा परीक्षण गरिरहेको देखिन्छ। अन्तिम समयमा नेप्से २००१ विन्दुबाट फर्किएको थियो।
लामो समयदेखि बजारको दिशा स्पष्ट हुन नसक्दा बजार 'साइडवेज' मै देखिएको छ, बजारले लगानीकर्ताहरूमा उत्साह जगाउन सकेको छैन।
बिहीबार कारोबार रकम भने केही बढेको छ।
बिहीबारको बजारमा ३ अर्ब २० करोड ६१ लाख ६७ हजार २५ रूपैयाँको सेयर कारोबार भएको छ।
गत कारोबार दिन अर्थात् बुधबार २ अर्ब २४ करोड ५४ लाख २२ हजार १९६ रूपैयाँको सेयर कारोबार भएको थियो।
बुधबारको तुलनामा आज कारोबार रकममा ९६ करोड रूपैयाँ वृद्धि भएको हो।
यस दिन ३०९ वटा धितोपत्रको ९५ लाख १८ हजार ७५ कित्ता सेयर किनबेच भएको हो।
बिहीबार ४९ कम्पनीको सेयर मूल्य बढेको छ भने १९७ वटाको घटेको छ। यस्तै, २ कम्पनीको सेयर मूल्य स्थिर रहेको छ।
यसदिन समाज लघुवित्तको सेयरमूल्य सर्वाधिक १० प्रतिशतले बढेको छ। उक्त कम्पनीको प्रतिकित्ता मूल्य दुई हजार १७६ रूपैयाँ ३० पैसा कायम भएको छ।
यस्तै, जोशी हाइड्रोपावरको सेयरमूल्य ९.८७ प्रतिशतले बढेर प्रतिकित्ता मूल्य ४१२ रूपैयाँ पुगेको छ।
हिमालय ऊर्जा विकास कम्पनीको सेयर मूल्य सर्वाधिक ७.७० प्रतिशतले घटेको छ। उक्त कम्पनीको सेयर मूल्य ३१० रूपैयाँमा झरेको छ।
यस्तै, बलेफी हाइड्रोपावरको सेयरमूल्य ६.६७ प्रतिशतले घटेर प्रतिकित्ता मूल्य ४७६ रूपैयाँ कायम भएको छ।
बिहीबार हिमालयन रिइन्स्योरेन्सको सर्वाधिक कारोबार भएको छ।
उक्त कम्पनीको प्रतिकित्ता ६२४ रूपैयाँमा १४ करोड ८७ लाख बराबरको सेयर कारोबार भएको हो।
यो मूल्य अघिल्लो दिनको तुलनामा १.४५ प्रतिशत घटेको हो।
सर्वाधिक सेयर खरिद–बिक्री हुने दोस्रो कम्पनीमा गोर्खाज फाइनान्स रहेको छ। उक्त कम्पनीको प्रतिकित्ता ६१९ रूपैयाँ ९० पैसामा १४ करोड १ लाख रूपैयाँ बराबरको सेयर कारोबार भएको छ।
आज कारोबारमा आएका १३ वटा समूहगत परिसूचकमध्ये वित्त र उत्पादन तथा प्रशोधन समूहको परिसूचक बढेको छ भने बाँकी ११ समूहको परिसूचक घट्दा समग्र नेप्से घटेको हो।
यसदिन उत्पादन तथा प्रशोधन समूहको परिसूचक सर्वाधिक १.१४ प्रतिशतले बढेको छ भने जलविद्युत समूहको परिसूचक सर्वाधिक १.९० प्रतिशतले घटेको छ।
-1742801159.jpg)
