नेपाल बैंकर्स संघका अध्यक्ष सुनिल केसीले बैंकहरूको वितरण योग्य नोक्सानी आर्थिक वर्षको अन्त्यसम्म थप बढ्न सक्ने बताएका छन्।
संघले आयोजना गरेको बैंकिङ क्षेत्रको वर्तमान अवस्थासम्बन्धी कार्यक्रममा उनले यस्तो बताएका हुन्।
बैंकहरूले कर्जा पुनर्संरचना गरेको कारण यस्ता कर्जाको ब्याज आम्दानी प्रभावित हुने र यसले गर्दा वितरणयोग्य नोक्सानीमा सुधार नहुने सम्भावना रहेको उनले बताएका हुन्।
उनले बैंकहरूको सेयरमा प्रतिफल (आरओई) घटेर ९ प्रतिशतमा सीमित भएको समेत जानकारी दिए।
केसीले बैंकिङ क्षेत्रबारे सडकबाट धेरै कुरा उठेको तर सरकारले समेत बैंकहरूलाई साथ नदिएको गुनासो गरे।
उनले अहिले बैंकहरूको हरेक बचत खातामा रहेको ५ लाख रूपैयाँ निक्षेपको बीमा गरिएको र यस्तो बीमा भएका कुल निक्षेप १२ खर्ब २३ अर्ब बराबर रहेको समेत बताएका छन्।