२०८१ असारको तुलनामा २०८२ असारमा बैंकहरूले दिने र लिने दुवै ब्याजदर घटेको छ।
नेपाल राष्ट्र बैंकको वार्षिक प्रतिवेदन अनुसार गत वर्ष ९१ दिने ट्रेजरी बिलको भारित औसत ब्याजदर ३ प्रतिशतबाट घटेर २.९५ प्रतिशतमा झरेको छ।
त्यस्तै, बैंक तथा वित्तीय संस्थाहरूबीचको अन्तर–बैंक कारोबारको भारित औसत ब्याजदर पनि २.९९ प्रतिशतबाट घटेर २.९६ प्रतिशतमा आएको छ।
वाणिज्य बैंकहरूको औसत आधार दर ८ प्रतिशतबाट घटेर ६.०२ प्रतिशतमा, विकास बैंकहरूको ९.७१ बाट ८.०३ प्रतिशतमा र वित्त कम्पनीहरूको ११.२१ बाट ८.९७ प्रतिशतमा झरेको छ।
यसले कर्जाको ब्याजदर पनि घटाउन मद्दत गरेको छ।
निक्षेपको भारित औसत ब्याजदर पनि घटेको छ। वाणिज्य बैंकहरूमा ५.७७ प्रतिशतबाट ४.१९ प्रतिशतमा, विकास बैंकमा ६.६३ बाट ४.८८ प्रतिशतमा र वित्त कम्पनीमा ७.९३ बाट ६.०१ प्रतिशतमा झरेको छ।
वाणिज्य बैंकहरूको कर्जाको भारित औसत ब्याजदर ९.९३ प्रतिशतबाट घटेर ७.८५ प्रतिशतमा, विकास बैंकहरूको ११.३४ बाट ८.९५ प्रतिशतमा र वित्त कम्पनीहरूको १२.५५ बाट १०.२२ प्रतिशतमा आएको छ।
२०८२ असार मसान्तसम्ममा नेपालमा कुल १०७ वटा बैंक तथा वित्तीय संस्था रहेका छन्।
यसमा २० वाणिज्य बैंक, १७ विकास बैंक, १७ वित्त कम्पनी, ५२ लघुवित्त वित्तीय संस्था र १ पूर्वाधार विकास बैंक छन्। बैंकका शाखा संख्या भने सामान्य घटेको छ।
२०८१ असार मसान्तमा ११,५३० शाखा रहेकोमा २०८२ असारमा यो संख्या घटेर ११ हजार ५२६ भएको छ।
-1746009348.jpg)
