चालु वर्षको दोस्रो महिना भदौमा अघिल्लो वर्षको तुलनामा आयात २२ प्रतिशतले घटेको छ।
भन्सार विभागका महानिर्देशक सुमन दाहालका अनुसार यो वर्षको दुई महिनामा १ खर्ब ७८ अर्ब ८४ करोड रुपैयाँ बराबरको वस्तु आयात भएको छ। अघिल्लो वर्षको भदौसम्म २ खर्ब २९ अर्ब रुपैयाँ बराबरको वस्तु आयात भएको थियो।
पछिल्लो समय अत्यावश्यक वस्तुको आयात सामान्य भएपनि अन्य पुँजी निर्माण गर्ने वस्तुको आयात पनि घटेको छ।
निषेधाज्ञा तथा लकडाउन जारी हुँदा सबैभन्दा धेरै आयात हुने पेट्रोलियम पदार्थको आयात खुम्चिएको छ भने होटल तथा रेष्टुरेन्ट बन्दा हुँदा खाना पकाउने ग्याँस लगायतका अन्य वस्तुको आयात घटेको हो।
कोरोना भाइरस संक्रमणको जोखिमका कारण देशभित्र आर्थिक गतिविधि ठप्प हुँदा त्यसको प्रभाव वैदेशिक व्यापारमा पनि देखिएको हो।
निर्यात भने १० प्रतिशतले बढेको छ। महानिर्देशक दाहालले दिएको जानकारीअनुसार भदौसम्म २० अर्ब रुपैयाँको वस्तु निर्यात भएको छ। अघिल्लो वर्ष १८ अर्बको निर्यात भएको थियो।
आयातमा आधारित भन्सार राजश्व भएकाले यो वर्षको दुई महिनामा २३ प्रतिशतले घटेको छ। विभागले यो दुई महिनामा ४७ अर्ब राजश्व उठाएको छ। अघिल्लो वर्ष ६२ अर्ब राजश्व उठेको थियो।