अंग्रेजी नयाँ वर्षको अवसरमा बुटवलमा सडक खाना महोत्सव सुरु भएको छ।
होटेल तथा रेस्टुरेन्ट व्यवसायी संघ रुपन्देहीले नेपाली मौलिक कला, संस्कृति, स्वाद र पहिचानको प्रवर्द्धन गर्दै आन्तरिक पर्यटन विकास र रोजगारी सिर्जना गर्ने उद्देश्यले सडक खाना महोत्सव आयोजना गरेको जनाएको छ।
बुटवल कालिका पथ सडकमा मंगलबार साँझदेखि सुरु गरिएको सडक खाना महोत्सवमा खानाका पारखी तथा आन्तरिक पर्यटकहरूको भिड लागेको छ।
बुटवल उपमहानगरपालिकाको संरक्षकत्वमा सुरु भएको महोत्सव बिहीबारसम्म चल्नेछ।
होटेल तथा रेस्टुरेन्ट व्यवसायी संघ रुपन्देहीका अध्यक्ष माधव खनालले नेपाली मौलिक कला संस्कृति, स्वाद र पहिचानको सम्मान, आन्तरिक पर्यटन प्रवर्द्धन, विकास र रोजगारी सृजनाका लागि सडक खाना महोत्सवले सघाउ पुर्याउने अपेक्षा गरिएको बताए।
सडकमै खाऔँ, सडकमै रमाऔँ भन्ने नाराका साथ सुरु भएको खाना महोत्सवले यस क्षेत्रको पर्यटन प्रवर्द्धन र विकास मात्र नभई नेपाली कला संस्कृति एवं खानपानका परिकारहरूको प्रचार प्रसार र बजारीकरण हुने उनले बताए।
सडक खाना महोत्सवमा विभिन्न जातजातिका खाना र खाजाका ५५ वटा स्टलहरू राखिएका छन्। साँझ ५ बजेदेखि राति १२ बजेसम्म चल्ने महोत्सव अवधिभर २ लाख दर्शकले अवलोकन गर्नुका साथै डेढ करोडको कारोबार हुने अध्यक्ष खनालले बताए।
मंगलबार राती महोत्सवको उद्घाटन गर्दै बुटवल उपमहानगरपालिकाका प्रमुख खेलराज पाण्डेयले रात्रिकालीन बजारमार्फत सहरलाई थप चलायमान बनाउने लक्ष्यका साथ महोत्सव आयोजना गरिएको बताए।
उनले कालिका पथ सडकलाई बुटवलको ‘सपनाको पथ’ का रूपमा विकास गर्ने योजनासहित व्यापार, पर्यटन र संस्कृतिलाई एकसाथ अघि बढाउने प्रतिबद्धता व्यक्त गरे।
‘स्थानीय तह, निजी क्षेत्र र समुदायबिच सहकार्य भए मात्र यस्ता कार्यक्रम दिगो बन्छन् तब मात्र मुलुक आर्थिक रूपमा बलियो बन्छ,’ उनले भने।
स्वाद, संस्कृति र पर्यटनलाई एकैसाथ प्रवर्द्धन गर्ने उद्देश्यसहित सुरु भएको बुटवल सडक खाना महोत्सवले स्थानीय अर्थतन्त्र चलायमान बनाउने अपेक्षा गरिएको छ।
-1746009348.jpg)
