रसुवा र तातोपानी भन्सार नाका अवरुद्ध भएपछि चीनसँगको व्यापार सहजीकरण गर्न मुस्ताङ जिल्लास्थित नेचुङ (कोरला नाका) बाट व्यापार सुरु भएको छ।
२०८२ भदौ ३० गतेदेखि पूर्ण रूपमा सञ्चालनमा आएको मुस्ताङ भन्सार कार्यालयले ६ दिनमा ३४ करोड ४७ लाख ४५ हजार २५२ रुपैयाँ राजस्व संकलन गरेको हो।
भन्सार विभागका अनुसार असोज ४ गतेसम्मको अवधिमा यो नाकाबाट २०९ वटा विद्युतीय गाडी र १०७ वटा मालवाहक ढुवानी साधनमा रहेका विभिन्न वस्तुहरू जाँचपास भएका छन्।
२०८२ असार २४ गते रसुवाको लेहेन्दे खोलामा आएको बाढीले रसुवा भन्सार कार्यालय पूर्ण रूपमा बन्द भएको थियो। तातोपानी भन्सार नाका जोड्ने कोदारी राजमार्गमा पहिरोका कारण अवरोध भएपछि वैकल्पिक नाकाका रूपमा कोरला नाका खोलिएको हो।
हाल यस नाकामा भन्सार जाँचपासलाई थप सहज बनाउन आसिकुडा प्रणाली समेत सञ्चालनमा आएको छ।
साथै, नेपाल राष्ट्र बैंकको २०८२ भदौ ३१ को परिपत्रअनुसार मुस्ताङ भन्सार कार्यालयलाई पनि चिनियाँ भूभाग हुँदै सामान आयात गर्न सकिने गरी एकीकृत परिपत्र २०८१ मा समावेश गरिएको छ।
-1746009348.jpg)
