काठमाडौंको रात्रिकालीन मनोरञ्जन व्यवसायलाई नयाँ उचाइमा पुर्याएका व्यवसायी विशाल तुलाचन अब आफ्नै जन्मथलो पोखरामा ५० करोड रूपैयाँभन्दा बढी लगानीमा विश्वस्तरीय क्लब निर्माण गर्ने तयारीमा छन्।
क्लब, रेस्टुरेन्ट, फुड कोर्ट, स्पा, रूफटप रेस्टुरेन्ट र बालबालिकाका लागि प्ले जोनसहितको भलक्यानो एक वर्षभित्र सञ्चालनमा ल्याउने उनको लक्ष्य छ।
उनी आफ्नो जन्मथलो पोखरामा 'भलक्यानो' नामक प्रिमियम क्लब निर्माण गर्ने तयारीमा जुटेका छन्।
उनको दाबी छ, भलक्यानो नेपालमा मात्र नभई अन्तर्राष्ट्रिय स्तरमै उदाहरणीय क्लब बन्नेछ।
विशालको व्यवसायप्रतिको रुचि सानैदेखि थियो। उनका बुबा राजेन्द्रबहादुर तुलाचनले सन् १९८४ अर्थात् २०४१ सालमा अरुणा बेकरी स्थापना गरेका थिए।
बेकरी सञ्चालनका लागि जर्मनीबाटै मेसिन ल्याएर व्यवसाय अघि बढाएका बुबाको कामलाई नजिकबाट हेर्दै हुर्किएका विशालले व्यवसायलाई नै आफ्नो भविष्यका रूपमा देख्न थाले।
परिवारमा व्यवसायप्रतिको लगाव थियो, तर विशालको सोच परम्परागत व्यवसायमा मात्र सीमित रहेन। उनी नयाँ क्षेत्रमा केही फरक गर्ने चाहना राख्थे। यही चाहनाले उनलाई युवावस्थामै मनोरञ्जन र इभेन्ट व्यवस्थापनको क्षेत्रमा पुर्यायो।
आज कलाकारका सांगीतिक कार्यक्रम सामान्यजस्तै लाग्न सक्छन्। तर, विशालले इभेन्ट व्यवसाय सुरू गर्दाको समय परिस्थिति फरक थियो।
कलाकार ल्याउने, कार्यक्रम व्यवस्थापन गर्ने र ठूलो संख्यामा दर्शक सहभागी गराउने काम आफैँमा चुनौतीपूर्ण थियो।
सन् १९९८ मा उनले कन्दरा ब्यान्ड र गायक सामसुङ तामाङलाई पोखरा ल्याएर भव्य कार्यक्रम आयोजना गरे।
नेपाली संगीत क्षेत्रमा चर्चित नेपथ्यसँग पनि उनले काम गरे। त्यसबेला पोखरामा यस्ता कार्यक्रम आयोजना गर्नु उनको व्यावसायिक साहसको उदाहरण थियो।
इभेन्ट कम्पनी विस्तार हुँदै थियो। उनको पहिचान पनि बन्दै थियो। तर, यही समयमा विशालले आफ्नो व्यावसायिक यात्रालाई अर्को देशमा लगेर नयाँ अनुभव बटुल्ने निर्णय गरे।
सन् १९९९ मा विशाल जापान गए। त्यहाँ उनले फोटोग्राफी अध्ययन गरे। विदेशीहरूसँग सहकार्य गर्दै काम गर्ने अवसर पाए भने टोकियोमा रेस्टुरेन्टसमेत सञ्चालन गरे।
जापानको बसाइले उनलाई अन्तर्राष्ट्रिय परिवेशमा काम गर्ने अनुभव दियो।
फरक संस्कृतिका मानिसहरूको जीवनशैली, व्यवसाय सञ्चालन गर्ने तरिका र मनोरञ्जन क्षेत्रको विकासलाई नजिकबाट बुझ्ने अवसर पनि मिल्यो।
तर, लामो समय विदेशमा बस्ने उनको चाहना रहेन। सन् २००५ मा नेपाल फर्किएपछि उनले रियल इस्टेट तथा हाउजिङ व्यवसाय सुरू गरे।
त्यसपछि 'फुड एक्स नेपाल' नामक कम्पनी स्थापना गरेर खाना डेलिभरी गर्ने व्यवसायमा समेत हात हाले।
एकपछि अर्को क्षेत्रमा काम गरे पनि विशालको रुचि नयाँ अवधारणा निर्माण गर्ने र मानिसलाई फरक अनुभव दिने व्यवसायप्रति थियो।
विदेश भ्रमणका क्रममा देखेका अन्तर्राष्ट्रियस्तरका क्लब र मनोरञ्जन स्थलहरूले उनलाई नेपालमै त्यस्तै केही निर्माण गर्न प्रेरित गरिरहेका थिए।
काठमाडौंको ठमेल अन्तर्राष्ट्रिय पर्यटकको प्रमुख गन्तव्य हो।
नेपाल आउने विदेशी पर्यटकमध्ये धेरैले ट्रेकिङ, हिमाल र प्राकृतिक सौन्दर्यलाई प्राथमिकता दिन्छन्।
तर, नेपालमा पनि अन्तर्राष्ट्रियस्तरको रात्रिकालीन मनोरञ्जन अनुभव लिन सकिन्छ भन्ने सन्देश दिनुपर्छ भन्ने विशाललाई लाग्यो।
यही सोचका साथ उनले काठमाडौंमा 'नोभा' क्लब स्थापना गरे। उनको उद्देश्य केवल एउटा नाइट क्लब सञ्चालन गर्नु थिएन।
नेपाली क्लब व्यवसायलाई हेर्ने दृष्टिकोणमा परिवर्तन ल्याउनु र विदेशी पर्यटकलाई समेत आकर्षित गर्ने स्तरको मनोरञ्जन स्थल निर्माण गर्नु थियो।
सुरूमा एक्लै लगानी गरेर अघि बढाएको व्यवसायमा पछि थप सात जना साझेदार जोडिए।
समयसँगै नोभाले आफ्नो पहिचान बनाउँदै गयो र अहिले नेपालका अग्रणी क्लबमध्ये आफ्नो स्थान बनाउन सफल भएको छ।
नोभामा कर्पोरेट कार्यक्रम, उत्पादन सार्वजनिक गर्ने समारोह तथा विभिन्न सामाजिक जमघट आयोजना हुन्छन्।
परिवारका सदस्यहरू पनि त्यहाँ पुगेर मनोरञ्जन लिँदा आफूलाई खुसी लाग्ने विशाल बताउँछन्।
उनका लागि व्यवसायको सफलता आम्दानीमा मात्र सीमित छैन। एउटा व्यवस्थित मनोरञ्जन स्थलले मानिसलाई नयाँ अनुभव दिनु, व्यवसायहरूलाई कार्यक्रम आयोजना गर्ने अवसर प्रदान गर्नु र रोजगारी सिर्जना गर्नु पनि उत्तिकै महत्त्वपूर्ण छ।
नोभाले अहिले करिब १७० जनालाई रोजगारी दिएको छ।
विशालका ८३ वर्षीय बुबा पनि बेलाबेला क्लब पुगेर मनोरञ्जन लिने गर्छन्।
परिवारको व्यवसायप्रतिको पुरानो लगाव र नयाँ पुस्ताको आधुनिक सोच एउटै ठाउँमा जोडिएको दृश्य उनका लागि विशेष अर्थ राख्छ।
नोभाको सफलतापछि पनि विशालको व्यावसायिक महत्त्वाकांक्षा रोकिएन।
केही महिनाअघि उनले काठमाडौँको बानेश्वरमा प्रिमियम ब्यांक्वेट 'बानेश्वर हिल्स' सञ्चालनमा ल्याए।
पोखरामा निर्माण गर्न लागिएको भलक्यानो विशालको अहिलेसम्मकै महत्त्वाकांक्षी परियोजनामध्ये एक हो।
करिब तीन रोपनी जग्गामा फैलिने यस परियोजनामा क्लब, फुड कोर्ट, रेस्टुरेन्ट, स्पा, रूफटप रेस्टुरेन्ट र बालबालिकाका लागि प्ले जोन निर्माण गर्ने योजना छ।
परियोजनाको तयारी अघि बढिसकेको र जग्गा भाडामा लिएर आवश्यक प्रक्रिया अगाडि बढाइएको विशाल बताउँछन्।
उनका अनुसार भलक्यानो निर्माणमा ५० करोड रुपैयाँभन्दा बढी लगानी हुने अनुमान छ।
यो परियोजना सञ्चालनका लागि उनले 'अर्बन भेन्चर्स' कम्पनी स्थापना गरेका छन्।
परियोजनाको अवधारणा र डिजाइन निर्माणमा पनि उनी आफैँ सक्रिय छन्।
भलक्यानोको डिजाइन तयार गर्दा उनले सिंगापुर, भियतनाम, थाइल्यान्ड र स्पेनका क्लबहरूको डिजाइन तथा संरचनाको अध्ययन गरेका छन्।
ती देशका विभिन्न क्लबमा देखेका विशेषतालाई समेटेर आफ्नै मौलिक अवधारणा निर्माण गर्ने उनको प्रयास छ।
उनका लागि विदेशी क्लबको नक्कल गर्नु मात्र उद्देश्य होइन।
विभिन्न देशमा सफल भएका अवधारणाबाट सिकेर पोखराको आवश्यकता, पर्यटकीय सम्भावना र नेपाली ग्राहकको रुचिअनुसार नयाँ स्वरूप तयार गर्नु उनको मुख्य लक्ष्य हो।
उनको अनुमानमा भलक्यानो सञ्चालनमा आएपछि करिब १२० जनाले प्रत्यक्ष रोजगारी पाउनेछन्।
यसले पोखराको आतिथ्य तथा मनोरञ्जन क्षेत्रमा नयाँ व्यावसायिक अवसरसमेत सिर्जना गर्ने अपेक्षा गरिएको छ।
पोखरा नेपालको प्रमुख पर्यटकीय सहर हो। फेवाताल, हिमाली दृश्य, साहसिक पर्यटन र प्राकृतिक सुन्दरताका कारण यो सहर देशभित्र र बाहिर उत्तिकै परिचित छ।
तर, विशालको बुझाइमा पर्यटकलाई आकर्षित गर्न प्राकृतिक सुन्दरता मात्रै पर्याप्त हुँदैन। स्तरीय आतिथ्य, खानपान र मनोरञ्जनका विकल्प पनि आवश्यक हुन्छन्।
विशेषगरी अन्तर्राष्ट्रिय पर्यटकलाई लक्षित गरेर निर्माण गर्न लागिएको भलक्यानोले पोखराको पर्यटनलाई फरक आयाम दिन सक्ने उनको विश्वास छ।
क्लब व्यवसायलाई समाजले हेर्ने दृष्टिकोणमा परिवर्तन ल्याउने प्रयास पनि उनको योजनासँग जोडिएको छ।
एक वर्षभित्र भलक्यानो सञ्चालनमा ल्याउने लक्ष्य राखेका विशालका लागि यो परियोजना अर्को व्यवसाय थप्ने निर्णय मात्रै होइन।
आफ्नै जन्मथलोमा आफूले विदेशमा देखेका र सिकेका अनुभवलाई प्रयोग गरेर केही ठूलो निर्माण गर्ने अवसरका रूपमा पनि उनले लिएका छन्।
